भुवन केसी, स्वेता खड्का लगायत चर्चित कलाकारहरु कांग्रेसमा प्रवेश
प्रकाशित मिति : बैशाख २०, २०७९ मंगलबार
आसन्न स्थानीय तहको निर्वाचनको पूर्वसन्ध्यामा चर्चित कलाकारहरु नेपाली कांग्रेसमा प्रवेश गरेका छन् ।
चर्चित नायक भुवन केसी, नायिका स्वेता खड्का, कलाकार रवीन्द्र खड्कालगायत आज कांग्रेसमा प्रवेश गरेका हुन् । प्रधानमन्त्री एवं कांग्रेस सभापति शेरबहादुर देउवाले आज उनीहरुलाई पार्टी प्रवेश गराएका प्रधानमन्त्रीको सचिवालयले जनाएको छ ।
प्रधानमन्त्री निवास बालुवाटारमा आयोजित कार्यक्रममा माइती नेपालका संस्थापक एवं पूर्वप्रदेश प्रमुख अनुराधा कोइराला, कांग्रेस नेतासमेत रहनुभएका कलाकार नीर शाहलगायत सहभागी थिए ।
कलाकार भुवन केसी यसअघि २०७० सालको संविधान सभा निर्वाचनमा एमाले प्रवेश गरेका थिए। उनले त्यसबेला टिकट पाए पनि विरोध भएका कारण टिकट फिर्ता भएको थियो। यस्तै केही साताअघि भुवन केसी स्वागत नेपाल नेतृत्त्वको दलबाट काठमाडौं महानगरको मेयर बन्ने समेत चर्चा चलेको थियो।