स्थलमार्गबाट अमेरिका आउनु अगाडि नै आई ९४ फर्म भर्न सीबीपीको सुझाव
प्रकाशित मिति : बैशाख २०, २०७९ मंगलबार
अमेरिकाको कस्टम एण्ड बोर्डर प्रोटेक्सन सीबीपीले स्थलमार्गबाट अमेरिका आउनेहरुलाई अमेरिकाको सिमाक्षेत्रमा आउनु अगाडि नै आई ९४ फर्म भर्न सुझाव दिएको छ । अमेरिका र क्यानडाको सिमाक्षेत्रबाट अमेरिका आउनेलाई पहिले नै आई ९४ भर्न र अनलाइनबाट शुल्क तिर्न सुझाव दिइएको हो ।
पोर्ट अफ इन्ट्रीमा समय बचत गर्नका लागि घरमा नै यो फर्म भरेर आउन प्रोत्साहन गरिएको हो । आई ९४ आवश्यक पर्ने यात्रुहरुलाई सिमाक्षेत्रमा प्रतिक्षा अवधि घटाउनका लागि सीबीपीले यो सुझाव दिएको हो ।
स्थलमार्गबाट अमेरिका आउँदै हुनुहुन्छ भने आई ९४ फर्म भर्न यहाँ क्लीक गर्नुहोला ।
अमेरिकी नागरिक, ग्रिनकार्डवाहक, अमेरिकाका बासिन्दा, अमेरिका भ्रमण गर्ने वा ट्रान्जिट बनाउने अधिकांश क्यानडाका नागरिक बाहेक प्राय सबै अमेरिका आउनेहरुका लागि स्थलमार्गबाट आउँदा आई ९४ फर्म आवश्यक हुन्छ । सिमानाकाबाट अमेरिका प्रवेश गर्दा यात्रुहरुलाई सीबीपीले आई ९४ फर्म जारी गर्छ ।
सीबीपीले यात्रुहरुलाई नयाँ डिजाइन गरिएको वेवसाइट हेर्न, विहान ६ बजे अगाडि वा दिउसो ३ बजेपछि सिमाक्षेत्रमा आउन, कागजातहरु तयारी अवस्थामा राख्न, गाडीमा भएका सबै सामानबारे जानकारी दिन तयार रहन, कस्ता खाद्य पदार्थ ल्याउन पाइन्छ भन्नेबारे जानकारी राख्न, हतियार भएको खण्डमा घोषणा गर्न र गाँजा घरमै राखेर आउन समेत टिप्सहरु दिएको छ ।