युएससीआईएसले आवेदन शुल्क लिएको ३० दिन नाघ्यो तर रिसिप्ट आएन ? चाल्नुहोस् यस्तो कदम
प्रकाशित मिति : श्रावण ८, २०७९ आईतबार
युएससीआईएसमा अध्यागमनबारेका कुनै पनि आवेदन दिइसकेपछि त्यसको रिसिप्ट प्राप्त नहुँदा कैयन आवेदकहरु हैरानीमा परेका छन् । ओम्बड्सम्यानले यदि युएससीआईएसमा आवेदन दिएपछि रिसिप्ट प्राप्त नभएमा त्यसबारे चाल्नुपर्ने कदमबारे प्रष्ट पारेको छ । युएससीआईएसको लकबक्समा पठाएका आवेदनका सन्दर्भमा आवेदकले रिसिप्ट नपाएमा कदमहरु चाल्न सक्नेछन् ।
यदि तपाईले कुनै अध्यागमन आवेदन दिनुभएको छ र युएससीआईएसले उक्त आवेदनको शुल्क लिइसकेको छ । तर ३० दिनसम्म पनि रिसिप्ट पठाएको छैन भने तपाईले युएससीआईएसलाई इमेल ठेगाना [email protected] मा इमेल गर्नुपर्छ । शुल्क तिर्नु नपर्ने कुनै आवेदनका सन्दर्भमा पनि ३० दिनसम्म तपाईले रिसिप्ट प्राप्त गर्नुभएको छैन भने तपाईको आवेदन युएससीआईएसमा पुगेको युएसपीएस वा अन्य कुरियर सेवाले निश्चित गरेको छ भने डेलिभर भएको मितिले ३० दिनपछि तपाईले युएससीआईएसमा इमेल गर्न सक्नुहुनेछ ।
त्यस्तै युएसपीएस वा अन्य कुरियर सेवाले आवेदन डेलिभर गरिसकेको छ तर युएससीआईएसले ३० दिनसम्म पनि रकम लिएको छैन वा आवेदनको रिसिप्ट पठाएको छैन भने पनि युएससीआईएसमा इमेल गर्नुपर्छ । इमेल गर्दा फर्म नम्बर, रिसिप्ट नम्बर भएको खण्डमा रिसिप्ट नम्बर, आवेदकको नाम, ठेगाना, डेलिभरी भइसकेको ट्रयाकिंग विवरण, युएससीआईएसले शुल्क लिएको भएमा शुल्कको प्रकार उल्लेख गर्नुपर्छ । एलियन नम्बर र सोसल सेक्युरिटी नम्बर उल्लेख गर्न आवश्यक छैन ।
त्यस्तै थोरैमात्र विवरण उल्लेख गरेर सुरुमै अस्वीकृत भएर फिर्ता आएका आवेदनका सन्दर्भमा फिर्ता हुनुको कारणबारे थप जानकारी आवश्यक परेमा पनि युएससीआईएसमा इमेल गर्न सकिनेछ । इमेल गर्दा कतिपय सेवाग्राहीको समस्या समाधान भएको छ भने कतिपयले भने इमेल प्रभावकारी नभएको बताएका छन् ।