१४५० सम्म केस नम्बर हुने डिभी २०२३ का नेपाली विजेताहरु अक्टोबरमा भिसा पाउन योग्य
प्रकाशित मिति : श्रावण २३, २०७९ सोमबार
डिभी २०२३ का विजेताहरुले अक्टोबरदेखि भिसा पाउन सुरु गर्नेछन् तर १४५० सम्म केस नम्बर हुने २०२३ का डिभी विजेता नेपालीहरु अक्टोबरमा भिसा पाउन योग्य हुने भएका हुन् । अमेरिकी विदेश मन्त्रालय ब्यूरो अफ कन्सुलर अफेयर्सले आज जारी गरेको भिसा बुलेटिन अनुशार डिभी २०२३ को पहिलो महिना नेपालीहरुलाई १४५० केस नम्बरको सिमाबन्दी लगाइएको छ ।
इरानलाई अक्टोबरमा २५ सय सम्म केस नम्बरमा सिमाबन्दी लगाइएको छ भने एसियाका अन्य देशलाई २८ सयसम्म केस नम्बरको सिमाबन्दी छ । अफ्रिकामा अल्जेरिया, इजिप्ट र मोरक्कोलाई छुट्टै सिमाबन्दी लगाइएको छ भने बाँकी देशलाई ५७ सय सम्म केस नम्बरको सिमाबन्दी लगाइएको छ ।
आर्थिक बर्ष २०२३ का डिभी विजेता नेपालीहरुको संख्या ३८०८ रहेको छ । एसियामा सबैभन्दा धेरै इरानका ५५०६ जनाले डिभी लोटरी पारेका छन् ।
अफ्रिकामा अल्जेरियाका ५५२६, कंगोका ४३८५, इजिप्टका ५५२९, मोरक्कोका ४४६९ र सुडानका ४८६३ जनाले डिभी लोटरी पारेका छन् । युरोपमा रसियाका ५५०४ र उज्वेकिस्तानका ५५११ जनाले डिभी लोटरी पारेका छन् । यसरी विश्वमा डिभी लोटरी पार्नेमा नेपालीहरु नवौं नम्बरमा छन् । युक्रेनका पनि ३८०८ जनाले नै डिभी लोटरी पारेका छन् ।
आर्थिक बर्ष २०२३ का लागि डिभी लोटरी पारेकाहरुले आगामी अक्टोबर १ देखि भिसा पाउन सुरु गर्नेछन् । उनीहरुले सन् २०२३ को सेप्टेम्बरभित्र भिसा पाइसक्नुपर्ने प्रावधान रहेको छ । कुल १ लाख १९ हजार २ सय ६२ जनाले डिभी लोटरी पारेकोमा अधिकतम ५५ हजारसम्मले भिसा पाउनसक्नेछन् ।
डिभी २०२३ मा ९५ लाख ७० हजार २ सय ९१ जना सहभागी भएका थिए । उनीहरुले गतबर्षको अक्टोबर ६ देखि नोभेम्बर ९ सम्म डिभी लोटरी भरेका थिए । अमेरिकाभित्रै हुने डिभी लोटरी विजेताहरुले युएससीआईएसमार्फत स्थीति समायोजन गरेर ग्रिनकार्ड पाउनसक्छन् भने बाहिर हुनेले कन्सुलर प्रकृयामार्फत भिसा प्राप्त गर्नेछन् ।
