डिभी २०२२ का थप अन्तरवार्ता तय गर्ने योजनामा छैन अमेरिकी दूतावास काठमाडौं
प्रकाशित मिति : भाद्र १, २०७९ बुधबार
अमेरिकी दूतावास काठमाडौंले अहिलेसम्म भिसा अन्तरवार्ताका लागि अप्वाइन्टमेन्ट नपाएका डिभी २०२२ का विजेताहरुलाई भिसा अप्वाइन्टमेन्ट दिने योजनामा नरहेको जनाइएको छ । सामान्यतया आप्रवासी भिसा अन्तरवार्ता एकदेखि २ महिना अगाडि नै तय गरिने तथा सेप्टेम्बरका लागि सबै भिसा अन्तरवार्ताको अप्वाइन्टमेन्ट तय भइसकेको दूतावासले जनाएको छ ।
कानून व्यवसायी कुर्तिस लि मोरिसनले दूतावासमा इमेलमार्फत गरेको सोधपुछमा दूतावासले त्यस्तो जवाफ दिएको हो । यदि कसैले अन्तरवार्ताको अप्वाइन्टमेन्ट रद्द गरेको खण्डमा भने नयाँ व्यक्तिलाई अन्तरवार्ता अप्वाइन्टमेन्ट दिनका लागि प्रयास गर्ने दूतावासले स्पष्ट पारेको छ । डिभी २०२२ का डिभी विजेताहरुले सेप्टेम्बरभित्र भिसा प्राप्त गरिसक्नुपर्ने प्रावधान रहेको छ ।
अमेरिकी दूतावास काठमाडौंलेमात्र नभई अन्य अमेरिकी दूतावासहरुले पनि सेप्टेम्बरका लागि आप्रवासी भिसाका अन्तरवार्ताहरु तय गरिसकेको बताएका छन् । सेप्टेम्बरका लागि कति डिभी विजेता नेपालीहरुको अन्तरवार्ता तय गरिएको छ भन्नेबारे भने विवरण सार्वजनिक गरिएको छैन । अक्टोबर १ देखि भने डिभी २०२३ का विजेताहरुले भिसा पाउन सक्नेछन् ।
जुन महिनामा डाइभर्सिटी भिसा प्राप्त गर्नेमा नेपालीहरु विश्वमै दोश्रो
जुन महिनामा ३५७ जना नेपालीहरुले डाइभर्सिटी भिसा प्राप्त गरेको तथ्यांक अमेरिकी विदेश मन्त्रालय ब्यूरो अफ कन्सुलर अफेयर्सले सार्वजनिक गरेको छ । एकमहिनाको अवधिमा यति धेरै डाइभर्सिटी भिसा प्राप्त गर्नेमा नेपालीहरु विश्वमै दोश्रो रहेका छन् ।
जुन महिनामा अर्मेनियाका ४७१ जनाले डाइभर्सिटी भिसा प्राप्त गरेका छन् । यो जुन महिनामा कुनै पनि देशका नागरिकले पाएको डाइभर्सिटी भिसामा विश्वमा नै सबैभन्दा धेरै हो । त्यपछि भिसा पाउनेहरु नेपालीहरु छन् ।
जुन महिनाका काठमाडौंको अमेरिकी दूतावासलेमात्र ३५१ जनालाई डाइभर्सिटी भिसा जारी गरेको छ । अन्य व्यक्ति अमेरिकामा नै स्टाटस एड्जस्ट गर्नेहरु र अन्य देशमा भिसा पाउने नेपालीहरु हुन् ।
मे महिनामा भने अमेरिकी दूतावास काठमाडौंले जम्मा ५४ जनालाईमात्र डाइभर्सिटी भिसा दिएको थियो । मे महिनामा विश्वभरबाट जम्मा ५९ जना नेपालीहरुले डाइभर्सिटी भिसा पाएका थिए ।
त्यस अगाडि अप्रिलमा ६४६ जनालाई अमेरिकी दूतावास काठमाडौंले डाइभर्सिटी भिसा दिएको थियो । मार्च र अप्रिलमा अमेरिकी दूतावास काठमाडौंले उल्लेख्य संख्यामा डाइभर्सिटी भिसा जारी गरेको थियो । मार्चमा अमेरिकी दूतावास काठमाडौंले २९४ जना डिभी विजेताहरुलाई भिसा जारी गरेको थियो ।
डिभी २०२२ का विजेताहरुले अक्टोबरदेखि नै भिसा प्राप्त गर्नुपर्ने भएतापनि झण्डै साढे ५ महिनासम्म भिसा नदिएको अमेरिकाले मार्चको तेश्रोसातादेखि भिसा दिन सुरु गरेको हो । अक्टोबरदेखि मार्चको दोश्रोसातासम्म अमेरिकी दूतावास काठमाडौंले डिभी विजेताको अन्तरवार्ता समेत लिएको थिएन ।
मार्च २१ सोमबारदेखिमात्र डिभी विजेताहरुको अन्तरवार्ता लिन सुरु गरेको अमेरिकी दूतावासले जनाएको थियो । मार्चमा अन्य देशबाट भिसा पाउने र अमेरिकामा नै स्थीति समायोजन गर्नेहरुको समेत संख्या जोड्दा कुल भिसा प्राप्त गर्ने डिभी विजेता नेपालीहरुको संख्या भने ३ सय ४ रहेको थियो । अप्रिलमा यो संख्या ६ सय ६२ रहेको थियो । यसरी चालु आर्थिक बर्षमा जुनसम्मको गणना गर्दा १३८२ जना नेपालीहरुले डाइभर्सिटी भिसा पाएका छन् ।
अमेरिकी विदेश मन्त्रालयका अनुशार आर्थिक बर्ष सन् २०२२ का लागि ३८०२ जना नेपालीहरुले डिभी लोटरी पारेका छन् । जुन एसियामा नै दोश्रो हो । एसियामा सबैभन्दा धेरै इरानका ५७३९ जनाले डिभी पारेका छन् ।
अमेरिकाले हरेकवर्ष डिभीबाट कति व्यक्ति अमेरिका आउन पाउने भन्ने कुराको निर्धारण गर्छ । गणना पूर्ण भइसकेपछि अमेरिको सरकारी निकायले त्यस्तो नम्बरको घोषणा गर्छ । तर कुनै पनि देशबाट कुल संख्याको ७ प्रतिशतभन्दा बढी व्यक्ति डाइभर्सिटी भिसामा अमेरिका आउन नपाउने नियम रहेको छ । जुन संख्या झण्डै ३८ सय हो ।