विदामा समेत अन्तरवार्ता लिएर गत महिना अमेरिकाले दियो १३४१ नेपालीलाई विद्यार्थी भिसा
प्रकाशित मिति : भाद्र ९, २०७९ बिहीबार
विदाका दिनमा समेत अन्तरवार्ता लिएर गत महिना अमेरिकी दूतावास काठमाडौंले १३४१ जना नेपालीलाई विद्यार्थी र विद्यार्थी डिपेन्डेन्ट भिसा दिएको छ । अमेरिकी दूतावास काठमाडौंबाट जुलाईमा १२२० जनाले विद्यार्थी भिसा एफवान र १२१ जना उनीहरुका डिपेन्डेन्टले एफ टु भिसा प्राप्त गरेका छन् । यो विवरण अमेरिकी सरकारको विदेश मन्त्रालय ब्यूरो अफ कन्सुलर अफेयर्सले बिहिबार सार्वजनिक गरेको हो ।
जुलाईमा विश्वभरबाट विद्यार्थी र विद्यार्थी डिपेन्डेन्ट भिसा पाउने नेपालीहरुको संख्या भने १४२६ रहेको छ । जसमध्ये १३०१ जनाले एफ वान र १२५ जना उनीहरुका डिपेन्डेन्टले एफ टु भिसा प्राप्त गरेका छन् । जुलाईमा विद्यार्थी भिसा दिनका लागि अमेरिकी दूतावास काठमाडौंले सुपर सन्डेका नाममा आइतबार पनि भिसा अन्तरवार्ता लिएको थियो ।
अमेरिकी दूतावास काठमाडौंले जुलाई १७ आइतबार विद्यार्थी भिसाका सयौं भिसा अन्तरवार्ताहरु लिएको थियो । जुन महिनाको अन्तिम सातादेखि अप्वाइन्टमेन्टहरु खुला गरेर उक्त दिन अन्तरवार्ता लिइएको थियो ।
सामान्यतया आइतबार दूतावास बन्द हुने भएतापनि विद्यार्थीहरुलाई अमेरिकामा अध्ययनका लागि अवशरको महत्व र उनीहरुको कक्षा समयमै सुरु गर्नुपर्ने अवस्थालाई मध्यनजर गरेर दूतावासले भिसा अप्वाइन्टमेन्टहरु उपलब्ध गराएको थियो ।
अमेरिकी दूतावास काठमाडौंमा भिसाको अप्वाइन्टमेन्ट पाउन मुस्किल रहेको गुनासो आइरहँदा त्यसलाई सम्बोधन गर्न दूतावासले यो प्रयास गरेको थियो । सुरुमा अप्वाइन्ट लिन चाहनेहरु र पछिको अप्वाइन्टमेन्ट अगाडि सार्न चाहनेहरुलाई पनि यो अवशर प्रदान गरिएको थियो ।