अमेरिका र युरोपमा भाइटीकाको साइत नेपालमा भन्दा एकदिन अगाडि, कहाँ कतिबेला ?
प्रकाशित मिति : कार्तिक ३, २०७९ बिहीबार
अन्तर्राष्ट्रिय पञ्चाङ्ग निर्णय समितिले विभिन्न देशमा रहेका हिन्दू धर्मालम्बीहरुका लागि भाइटीकाको छुट्टाछुट्टै साइत निकालेको छ ।
समितिको असौज ३० गते बसेको बैठकले विभिन्न देशको समय अनुसार भाइलाई टीका लगाउने साइतको समय निर्धारण गरेको अन्तर्राष्ट्रिय पञ्चाङ्ग निर्णय समितिका अध्यक्ष डा. माधव भट्टराईले बताए ।
यसले रोजगारका शिलशिलामा विभिन्न देशमा रहेका नेपालीहरुलाई सहयोग पुग्ने उनको भनाइ थियो । मान्छेको बसोवासको आधारमा अक्षांश– देशान्तर, चर आदिलाई तिथि, घडीपलाका आधारमा सूर्यको उदयबाट गणना गरेर त्यो स्थानमा बसोवास गर्ने मानिसले लगाउने टीकाको साइत निर्धारण गर्न सकिन्छ ।
जस अनुसार यसपालिको भाईटीका लगाउने शुभ साइत नेपालमा कार्तिक १० गते अर्थात अक्टोबर २७ तारिख विहान ११ : ३७ बजे शुभ साइत निर्धारण गरिएको छ भने अमेरिकाको न्यूयोर्क अर्थात् पूर्वी भागमा अक्टोबर २६ तारिख दिनको ११ बजेर २५ मिनेटको शुभ साइत रहने जारी विज्ञप्तिमा उल्लेख छ भने वासिंगटन डीसीलगायत मेरिल्याण्ड, भर्जिनियामा ११:३७ बजेको शुभ साईत छ, अमेरिकाकै टेक्सासमा ११: ३३ बजेको साईत शुभ रहेको छ ।
त्यसैगरी कतारमा ११:०७मा र क्यानडामा ११:३७ बजे नै भाइटीकाको शुभ साइत निर्धारण गरिएको छ । त्यसैगरी क्यालिफोर्नियामा ११: ३१ बजे तथा अस्ट्रेलियाको सिड्नीमा भने अक्टोबर २७ तारिख ११:१५ मा छ भने सोही दिन जापानको टोकियोमा ११:३१ मा निस्केको छ ।
कार्तिक १० गते अर्थात् अक्टोबर २७ तारिख बिहान भारतको नयाँ दिल्लीमा ११:५५ बजे भने सोही दिन मलेसियाको क्वालालम्पुरमा १२:३१ बजे, युएईको अवुधाबीमा ११:४५ बजे समय तोकिएको छ ।
कतारको दोहामा सोही दिन बिहान ११: ०७ बजे, थाइल्याण्डको बैंककमा ११: २५ बजे, दक्षिण कोरियाको सियोलमा ११:१७ बजेको समय तोकिएको छ भने यस्तै, इजरायलको तेलअभिभमा ११: ५५ बजे, सिंगापुरमा ११:५३ बजे, हङकङमा ११:४५ बजे र साउदी अरेबियामा ११: १५ बजेको समय तोकिएको सो समितिले जनाएको छ ।
यसैगरी बेलायतको लण्डन सिटीमा २६ तारिखको ११:१५ बजे छ भने फ्रान्सको पेरिसमा सोही दिन ११:५५ बजेको साईत निस्किएको छ ।