भारतीय मूलका ऋषि बेलायती प्रधानमन्त्री बन्ने, इतिहासमै श्वेतबाहेकको पहिलो प्रधानमन्त्री
प्रकाशित मिति : कार्तिक ७, २०७९ सोमबार
बेलायतका लागि लिज ट्रसको आर्थिक योजनाहरू परीकथा भएको चेतावनी दिने पूर्व चान्सलर ऋषि सुनक सोमबार उनको उत्तराधिकारी बन्ने प्रतिस्पर्धामा विजयी भएका छन् । सुनकले गहिरो आर्थिक र राजनीतिक अशान्तिको समयमा विश्वको छैटौं ठूलो अर्थतन्त्रको जिम्मेवारी लिएका थिए ।
एकमात्र बाँकी प्रतिद्वन्द्वी, पूर्व रक्षा मन्त्री पेनी मोर्डाउन्टले ट्वीटरमा प्रतिस्पर्धाबाट बाहिरिने घोषणा गरेपछि सुनक अब औपचारिक रूपमा डाउनिङ स्ट्रिटमा प्रवेश गर्नेछन् । मोर्डाउन्टले ‘ऋषिलाई आफ्नो पूर्ण समर्थन भएको बताएकी छिन् ।
उनी अब बेलायतको इतिहासमा श्वेतबाहेकको पहिलो प्रधानमन्त्री हुने भएका छन् । ४२ वर्षीय सुनक भारतीय आप्रवासीका छोरा हुन् । सुनकको जन्म दक्षिणी अङ्ग्रेजी तटमा रहेको साउथह्याम्प्टनमा छ दशकअघि ब्रिटिश औपनिवेशिक पूर्वी अफ्रिकाबाट आएका भारतीय मूलका बाबुआमाबाट भएको थियो।
बेलायतमा पहिलोपटक श्वेतबाहेकको प्रधानमन्त्रीको रूपमा इतिहास रचिनु एक बहुभाषिक राष्ट्रका लागि कोशेढुङ्गा हो । हालका दशकहरूमा बेलायत जातीय रूपमा धेरै विविधता आएको छ, यद्यपि कहिलेकाहीं आप्रवासी विरोधी भावना समेत बढ्ने गरेको छ ।
सुनक पहिलो पटक २०१५ मा सांसदको रूपमा निर्वाचित भएका थिए भने दुई वर्ष ब्याकबेन्चमा बिताए । जसको दौरान ब्रेजिक्टले राजनीतिक एजेन्डालाई दबाएको थियो । सन् २०१६ को जनमत संग्रहमा सुनकले ईयू छोड्ने समर्थन गरेका थिए ।
त्यसपछि उनी थेरेसा मेको सरकारमा कनिष्ठ मन्त्री भए। बोरिस जोनसनले सुनकलाई पहिलो प्रमुख सरकारी भूमिका दिए जब पहिलो पटक उनलाई सन् २०१९ मा ट्रेजरीको चिफ सेक्रेटरी र २०२० मा चान्सलरको रूपमा नियुक्त गरियो ।
सुनकले महामारीको प्रारम्भिक हप्ताहरूमा लोकप्रियता जितेका थिए किनकी उनले लकडाउनको समयमा काम गर्न नसक्नेहरूको लागि सहयोग गर्न व्यापक योजनाहरु लगाएका थिए ।
ऋषि सुनकले अब मङ्गलवारबाट नै प्रधानमन्त्रीको रूपमा काम सुरु गर्नसक्ने देखिन्छ। तर समस्याहरू चाङ लागेर बसेका छन्।
गहिरो गरी विभाजित भएको पार्टी, महँगी, कमजोर सार्वजनिक वित्तीय र सत्ताधारी दलले चुनावी वैधानिकता गुमाइसकेको दाबी केही त्यस्ता चुनौती हुन्।