महिलालाई हेरेको निहुमा दलित परिवारका तीन जनाको गोली हानेर हत्या
प्रकाशित मिति : कार्तिक ९, २०७९ बुधबार
भारतको मध्य प्रदेशको दमोह जिल्लाको गाँउ देवरानमा दीपावलीको एक दिनपछि मंगलबार महिलालाई हेरेको निहुमा भएको झगडामा दलित परिवारका तीन जनाको गोली हानी हत्या गरिएको छ । झगडाको वास्तविक कारण थाहा पाउन प्रहरी र प्रशासनका अधिकारीहरूले अनुसन्धान गरिरहेको जनाएका छन् ।
चार जनालाई पक्राउ गरिएको छ भने तीन जनाको खोजी भइरहेको छ । उनीहरु पनि छिट्टै पक्राउ पर्ने प्रहरीले जनाएको छ ।
प्रहरीका अनुसार मंगलबार बिहान जगदीश पटेल र अहिरवारका परिवारबीच झगडा सुरु भएको थियो । त्यसपछि विवाद बढ्दै जाँदा जगदीश पटेलको परिवारले अहिरवारको परिवारका सदस्यमाथि गोली प्रहार गर्दा तीन जनाको घटनास्थलमै मृत्यु भएको थियो भने दुईजना गम्भीर घाइते भएका थिए । घाइतेहरुलाई जिल्ला अस्पतालमा भर्ना गरिएको छ ।
६० वर्षीय गौरव अहिरवार, ५८ वर्षीय रामप्यारी अहिरवार र ३२ वर्षीय छोरा मानकलाल अहिरवारको घटनास्थलमै मृत्यु भएको हो । जबकि ३० बर्षका महेश अहिरवार र २८ बर्षका बब्लु अहिरवार गम्भीर अवस्थामा अस्पताल भर्ना भएका छन् ।
प्रहरीले पटेल परिवारका जगदीश पटेल, सौरभ पटेल, मनिष पटेल, शुभम पटेल, कोडु पटेल र घनश्याम पटेल विरुद्ध हत्या सम्बन्धि ऐन अन्तर्गत मुद्दा दर्ता गरेको छ। घटनापछि सातै जना फरार रहेकामा चार जनालाई प्रहरीले पक्राउ गरेको हो ।
मानकलाल अहिरवारले मुख्य अभियुक्त जगदीश पटेलकी पत्नीलाई हेर्ने गरेको भनिएको थियो । यसै विषयमा विवाद सुरु भएको थियो । गाउँका केही मानिसले विवादको कारण जग्गा रहेको बताएका छन् । तर प्रहरीका अनुसार हत्याको कारण भने खुल्न सकेको छैन ।
पटेल परिवारको गाउँमा राम्रो स्थान छ र उनीहरूसँग लाइसेन्स प्राप्त बन्दुक पनि थियो जुन हत्यामा प्रयोग गरिएको थियो। दुबै परिवारको घर नजिकै छ । उनको जग्गा पनि वरपर छ । दलित परिवारका तर्फबाट पटेल परिवारको नियत उनीहरूको जग्गा कब्जा गर्ने रहेको र त्यसैले यो सम्पूर्ण विवाद भएको बताइएको छ ।
पटेल परिवारमाथि घर नजिकैको सरकारी जग्गा कब्जा गरेको आरोप पनि छ । सोही कारण प्रशासनले उनको घरमा अतिक्रमण हटाउन सूचना टाँसेको थियो । परिवारले जग्गा अतिक्रमण गरेको भन्नेबारे प्रशासनले अनुसन्धान गरिरहेको छ ।
हत्यापछि परिवारका सदस्य र दलित वर्गले तीनै जनाको शव जिल्ला अस्पताल बाहिर राखेर सडक अवरुद्ध समेत गरेका थिए । पोष्टमार्टमपछि तीनै जनाको शव छुट्टाछुट्टै सवारी साधनमा गाउँ पठाइएको थियो । त्यहाँ प्रहरीको बाक्लो उपस्थितिमा उनको अन्तिम संस्कार गरिएको थियो ।
अहिले यो विषयमा राजनीति पनि सुरु भएको छ । बहुजन समाज पार्टीकी सुप्रीमो मायावतीले यस घटनालाई लिएर ट्वीट गर्दै मध्य प्रदेशमा पनि दलित र आदिवासी समाजमाथि अत्याचार जारी रहेको बताएकी छन् ।
1. मध्यप्रदेश में भी दलित व आदिवासी समाज पर अत्याचार लगातार जारी। आज ही दमोह जिले के देवराँन में दबंगों ने दलित परिवार पर अन्धाधुन्ध फायरिंग की और फिर पत्थर से कुचलकर तीन लोगों की हत्या कर दी। बाकी घायलों ने भागकर जान बचाई। इस हृदयविदारक घटना की जितनी निन्दा की जाए वह कम। 1/2
— Mayawati (@Mayawati) October 25, 2022
डाँकाहरुले दलित परिवारमाथि अन्धाधुन्ध गोली प्रहार गरी ढुङ्गाले हानेर तीनै जनाको हत्या गरेको र बाँकीले भागेर आफ्नो ज्यान बचाएको मायावतीले बताएकी छिन् । यो हृदयविदारक घटनाको जति निन्दा गरे पनि कम हुने तथा यो अन्धकार युगको पछिल्लो घटनाले मध्य प्रदेशको भाजपा सरकारको कानून र व्यवस्थाका साथै गरिब, दलित, आदिवासी र महिला आदिको सुरक्षामा सरकारको असफलतालाई उजागर गर्ने उनको भनाई छ ।
पूर्व मुख्यमन्त्री कमलनाथले पनि ट्वीट गर्दै घटनाको उच्चस्तरीय छानबिनको माग गरेका छन्।
मध्यप्रदेश के खरगोन के मोगरगाँव-गढ़ी मार्ग पर एक टेंकर के पलटने के बाद उसमें हुई ब्लास्ट की घटना में कई लोगों के झुलसने , कुछ लोगों की मृत्यु व बड़ी संख्या में लोगों के घायल होने का बेहद दुखद समाचार मिला है।
— Kamal Nath (@OfficeOfKNath) October 26, 2022
उनले मध्य प्रदेशको दमोह जिल्लाको देवरानमा भएको गोलीकाण्डमा एक दलित परिवारका तीन जनाको ज्यान गएको र दुई जना घाइते हुनु अत्यन्तै दुखद कुरा भएको बताएका छन् । उनले यस घटनाको सरकारसँग उच्चस्तरीय छानबिनको माग गर्नुका साथै घटनाका दोषीलाई कडा कारबाहीको माग गरेका छन् ।
यस घटनामा केन्द्रीय राज्यमन्त्री प्रह्लाद पटेलले अन्तस्करणलाई हल्लाउने यो हत्या भयानक र दुखद रहेको बताएका छन् । उनले भनेका छन् – ‘मृतकका परिवारलाई भगवानले शान्ति प्रदान गरून्, म संयमताको अनुरोध गर्दछु। म गम्भीर छलफलको आवश्यकता महसुस गर्दछु।’
दमोहका कलेक्टर एस कृष्ण चैतन्यले प्रशासनले पीडितहरूलाई सबै सम्भव सहयोग गरिरहेको बताएका छन् । परिवारका सदस्यहरूलाई पनि सुरक्षा प्रदान गरिएको छ र कुनै पनि अपराधीलाई नछाडिने उनले बताएका छन् ।
राष्ट्रिय अपराध अभिलेख ब्यूरोको तथ्यांक अनुसार मध्यप्रदेशमा दैनिक औसत २० वटा दलित अत्याचारका मुद्दा दर्ता हुने गरेको छन् ।
तथ्याङ्कले यो पनि देखाउँछ कि सन् २०२१ मा यो राज्य दलितहरू विरुद्ध दर्ता गरिएका मुद्दाहरूमा पहिलो नम्बरमा थियो, जहाँ प्रत्येक एक लाख जनसंख्यामा ६४ मुद्दाहरू दर्ता भएका थिए।