अर्को देशमा भिसा अप्वाइन्टमेन्ट उपलब्ध भएमा त्यही आवेदन दिन अमेरिकी विदेश मन्त्रालयको सुझाव
प्रकाशित मिति : कार्तिक ९, २०७९ बुधबार
आफू बसेको देशमा रहेको अमेरिकी दूतावास वा कन्सुलेटमा अमेरिकाको भिसाका लागि अप्वाइन्टमेन्ट उपलब्ध नभएको खण्डमा अर्को देशमा गएर समेत भिसाका लागि आवेदन दिन सकिने अमेरिकी विदेशमन्त्रालयले जनाएको छ । अर्को कुनै दूतावास वा कन्सुलेटमा भिसा अन्तरवार्ताका लागि अप्वाइन्टमेन्ट उपलब्ध भएको खण्डमा त्यही आवेदन दिन अमेरिकी विदेश मन्त्रालयले सुझाव दिएको हो ।
विदेश मन्त्रालयले भनेको छ -‘हामी यात्रा गर्न सक्ने भिसा आवेदकलाई भिसा अप्वाइन्टमेन्टका लागि प्रतिक्षा अवधि छोटो भएका अरु दूतावास वा वाणिज्य दूतावासमा आवेदन दिनका लागि विचार गर्न प्रोत्साहन गर्दछौं । जहाँ अपोइन्टमेन्टहरू उपलब्ध छन्, त्यो दूतावास वा कन्सुलेट तपाईको गृह देश भन्दा बाहिर भएतापनि आवेदन दिनको लागि कुनै बाधा हुनेछैन ।’
खासगरी भिजिटर लगायतका गैर आप्रवासी भिसाका लागि आवेदन दिन चाहनेहरुले अन्य देशको अमेरिकी दूतावास वा कन्सुलेटमा गएर भिसाका लागि अन्तरवार्ता दिन सक्नेछन् । नेपालमा अहिले अमेरिकाको भिजिटर भिसाका लागि अप्वाइन्टमेन्ट लिन औषतमा १ बर्ष लाग्ने गरेको छ । तर सिंगापुरमा भने औषतमा ११ दिनमा भिसा अप्वाइन्टमेन्ट पाउन सकिन्छ ।
अर्थात् यात्रा गर्न सक्ने नेपालीले सिंगापुरमा रहेको अमेरिकी दूतावासमा गएर अमेरिकी भिसाका लागि आवेदन दिनसक्छन् । त्यस्तै मलेसियाको क्वालालम्पुरमा झण्डै २ महिनामा भिजिटर भिसाका लागि अप्वाइन्टमेन्ट पाउन सकिन्छ भने दोहामा पनि झण्डै २ महिनामा अमेरिकाको भिजिटर भिसाका लागि अप्वाइन्टमेन्ट पाउन सकिन्छ ।
यदि तपाई दिल्ली वा मुम्बई जाने योजनामा हुनुहुन्छ भने पुनर्विचार गर्नुहोला । किनभने दिल्ली वा मुम्बईमा रहेको अमेरिकी दूतावासमा भिजिटर भिसाका लागि अप्वाइन्ट पाउन झण्डै ३ बर्ष लाग्ने गरेको छ । तर तपाई लण्डनमा हुनुहुन्छ भने २ महिनामा अप्वाइन्टमेन्ट पाउन सक्नुहुनेछ ।