अमेरिकाको न्युजर्सीमा गाडीको ठक्करबाट ५३ बर्षका नेपालीको मृत्यु
प्रकाशित मिति : मंसिर २४, २०७९ शनिबार
अमेरिकाको न्यूजर्सीमा गाडीको ठक्करबाट ५३ बर्षीय नेपालीको दल बहादुर बरुवालको मृत्यु भएको छ । न्युजर्सीको राज्यको क्याम्डेन काउन्टी निवासी म्याग्दीका बरुवालको लिन्डेनवल्डमा गाडीले ठक्कर दिंदा निधन भएको हो ।
बिहिबार बेलुका पौने ६ बजेको समयमा गाडीले ठक्कर दिएको थियो । घटनास्थलमा उपचार पछि उनलाई जेफरसन स्ट्र्याटफोर्ड अस्पतालमा लगिएकोमा ६ बजेर ३७ मिनेटमा मृत घोषित गरियो।
ठक्करदिएपछि गाडी घटनास्थलबाट भागेको थियो । प्रहरीले ठक्कर दिने गाडीको खोजी गरिरहेका छन्।
झण्डै २० बर्ष अगाडि अमेरिका आएका बरुवाल न्युजर्सीको सोमरडेलमा सपरिवार बस्दै आएका थिए । काम सकिएर घर फर्किने क्रममा बाटो काट्दा गाडीले ठक्कर दिएको जनाइएको छ ।