अचारदेखि चियासम्म सयौं नेपाली उत्पादन अमेरिकामा, ‘नेपाल सरकारको सहयोग आवश्यक’: व्यवसायी
प्रकाशित मिति : मंसिर २६, २०७९ सोमबार
अचारदेखि चियासम्मका सयौं नेपाली उत्पादन नेपालबाट अमेरिकामा आयात भइहरेको जानकारी दिदै व्यवसायीहरुले यसको थप प्रवद्र्धनका लागि नेपाल सरकारको सहयोग आवश्यक रहेको बताएका छन् । नेपाली उत्पादन, परिकार तथा पर्यटन प्रवर्द्धनमा गैरआवासीय नेपाली समुदायको भूमिका विषयमा नेपाली महावाणिज्यदूतावास न्युयोर्कले गैरआवासीय नेपाली संघ, अमेरिका न्युयोर्क च्याप्टरसंगको सहकार्यमा गरेको अन्तरकृयामा व्यवसायीले यस्तो सुझाव दिएका हुन् ।
न्युयोर्कको ज्याक्सनहाइटमा रहेको शेर्पा किदुग हलमा शनिबार आयोजित कार्यक्रममा व्यवसायीहरुले नेपालबाट अचारदेखि चिया, चाउचाउ लगायतका सयौं उत्पादनहरु अमेरिकामा आयात गर्दाका अनुभवहरु सुनाए । अनिल रौनियार, लिंकन एभरेष्ट, सुमित अग्रवाल, निश्चल बांस्कोटा, दुर्गेशजंग कार्की, मनीष कर्ण र साङ्गदोर्जे शेर्पा लगायतले नेपाली उत्पादन आयात गर्दाका प्रकृया, चुनौती र अवशरहरुबारे जानकारी दिएका थिए ।
उनीहरुले नेपाली उत्पादनको प्रवर्द्धनका लागि आआफ्ना तर्फबाट भइरहेका प्रयासबारे जानकारी दिदै , नेपालमा स्थानीय स्तरमा उत्पादित बस्तुदेखी लिएर अन्य बस्तु निर्यातसंजालमा जोड्न, जिएसपी नवीकरण, भंसार सुविधा, बजारीकरण र नेपाली बस्तुको गुणस्तर कायम राख्न नेपाल सरकारको सहयोग आवश्यक रहेको बताए ।
कार्यक्तममा कार्यवाहक महावाणिज्यदूत बिष्णु गौतमले नेपाल र अमेरिकाबीच रहेको मैत्रीपूर्ण र सुमधुर कूटनीतिक सम्बन्धलाई अझ प्रगाढ पार्न जनस्तर र व्यवसायस्तरका सम्बन्धको महत्वपूर्ण भूमिका हुने बताए । दुईदेशबीचको कूटनीतिक सम्बन्धको पचहत्तरौं बार्षिकोत्सबको प्रसंग उठाउँदै उनले नेपाल र अमेरिकाबीचको व्यापार, पर्यटन, शैक्षिक तथा सांस्कृतिक आदानप्रदान अझ बृद्धिगर्न नेपाली व्यवसायी, शैक्षिक संस्था, नेपालका मित्र अमेरिकी नागरिक, पर्यटक, तथा गैरआवासीय नेपाली समुदायको संजाल निकै प्रभावकारी हुनसक्ने बताए ।
उनले नेपाल र अमेरिकाबीचको व्यापारमा दुवै देशलाई लाभ हुनेगरी उच्च बृद्धि संभव रहेको र यसका लागि थप बजारीकरण जरुरी रहेको बताउँदै दुईपक्षीय व्यापारको अवस्था, अमेरिका निर्यात भइरहेका र उच्च संभावना भएका नेपाली बस्तु र ती बस्तुले अमेरिकी बजार प्रवेशमा पाउने सुविधाबारे जानकारी दिए । अमेरिकामा नेपाली परिकार र पर्यटन प्रवर्द्धनमा संलग्न व्यवसायीले खेलेको भूमिकाको प्रसंसा गर्दै उनले बढ्दो नेपाली समुदाय र विस्तारित संजालबाट संख्यात्मक र गुणात्मक दुवै रुपमा नेपालको प्रवर्द्धनमा अझबढी योगदानका लागि नेपाली समुदायलाई आग्रह गरे ।
वाणिज्यदूत गणेश अधिकारीले संचालन गरेको कार्यक्रममा एनआरएनए न्युयोर्क च्याप्टरका उपाध्यक्ष शोभाकान्त पाण्डेले गैरआवासीय नेपालीको मातृभूमीसंग निकट र भावनात्मक सम्बन्ध रहेको र नेपाल सरकारले देशको आर्थिक सम्बृद्धिका लागि एवम् नेपाली बस्तु निर्यात तथा पर्यटन प्रवर्द्धनका लागि चालेका कदममा गैरआवासीय नेपाली समुदायको साथ र सहयोग रहने प्रतिवद्धता व्यक्त गरे ।
