अमेरिकाका केही गैर आप्रवासी भिसा अन्तरवार्ता छुट १ बर्ष थप, २०२२ मा आधा भिसा ‘विना अन्तरवार्ता’
प्रकाशित मिति : पुस ८, २०७९ शुक्रबार
![](https://i0.wp.com/www.khasokhas.com/wp-content/uploads/2022/12/52553066582_e168d61850_o.jpg?fit=1344%2C719&ssl=1)
अमेरिकाको गैर आप्रवासी कामदार, विद्यार्थी र अन्य गैर आप्रवासी भिसामा अन्तरवार्ता छुट एकबर्ष थप गरिएको छ । सन् २०२३ को डिसेम्बर ३१ सम्म लागु हुने गरी अन्तरवार्ता छुटको अवधि थपिएको विदेश मन्त्रालयले घोषणा गरेको छ ।
भिसाको ब्याकलग कम गर्न यो नीति लम्बाइएको विदेश मन्त्रालयको भनाई छ । पहिलोपटक भिसा आवेदन दिनेहरु र नविकरण गर्नेहरुका सन्दर्भमा यो छुट लागु हुनेछ । अस्थायी कृषि कामदार, अस्थायी गैर कृषि कामदार, एफ र एम भिसाका विद्यार्थीहरु, एक्सचेन्ज भिजिटर, एचवान बी कामदार भिसा, प्रशिक्षार्थी वा विशेष शिक्षा आगन्तुकको एच थ्री भिसा, अन्तरकम्पनी ट्रान्सफर एल भिसा, असाधारण क्षमता वा उपलब्धि भएका व्यक्तिहरूलाई दिइने ओ भिसा, खेलाडीहरू, कलाकारहरू, मनोरन्जनकर्ताहरूलाई पी भिसा, र अन्तर्राष्ट्रिय सांस्कृतिक आदानप्रदान कार्यक्रमहरूमा सहभागीहरू हुने क्यु भिसामा यस्तो छुट दिइनेछ ।
![](https://i0.wp.com/www.khasokhas.com/wp-content/uploads/2022/10/Visa.jpeg?resize=720%2C480&ssl=1)
कन्सुलर अधिकारीहरुलाई अब सन् २०२३ को डिसेम्बर ३१ सम्म नै पेटिसनमा आधारित गैर आप्रवासी कामदार भिसाका निश्चित आवेदकको भिसा अन्तरवार्तामा छुट दिने अधिकार प्रदान गरिएको छ ।
भिसा अन्तरवार्ता आवेदकले भिसा पाउनुभन्दा अगाडिको अन्तिम प्रकृया हो । यो अन्तरवार्तापछि आवेदकलाई भिसा दिने वा नदिनेबारे अन्तिम निर्णय गरिन्छ । तर कोरोनाको महामारीका कारण कन्सुलर सेवा प्रभावित हुँदा भिसा अन्तरवार्ताहरु रोकिने र ढिलो हुने समस्या देखिएको थियो ।
अन्तरवार्ता छुटको व्यवस्थाले यसरी ब्याकलगमा रहेका भिसालाई प्रकृयामा लैजानका लागि कन्सुलर अधिकारीहरुलाई अधिकार प्रदान गर्छ ।
दूतावासहरुले आवश्यक परेमा उनीहरुको अन्तरवार्ता भने तय गर्न सक्नेछन् । स्थानीय अवस्थालाई र हरेक आवेदनलाई मूल्यांकन गरेर कुनै कुनै आवेदनमा अन्तरवार्ता लिने छुट दूतावास र कन्सुलेटहरुलाई रहेको विदेश मन्त्रालयले प्रष्ट पारेको छ ।
आर्थिक वर्ष २०२२ मा जारी गरेको झण्डै ७० लाख गैरआप्रवासी भिसामध्ये झण्डै आधालाई व्यक्तिगत अन्तर्वार्ता बिना नै भिसा दिइएको विदेश मन्त्रालयले जनाएको छ । नयाँ नीतिले भिसा पर्खाइको समयलाई सफलतापूर्वक घटाएको र पर्यटक भिसा आवेदकहरू सहित पर्खाइको समयलाई सकेसम्म चाँडो अझ कम गर्न हर प्रयास गर्ने विदेश मन्त्रालयको भनाई छ ।