अब शरणार्थी/एसाइलीले परिवारका लागि आवेदन टेक्सास सर्भिस सेन्टरमा मात्र पठाउनुपर्ने
प्रकाशित मिति : पुस २०, २०७९ बुधबार
अब अमेरिकामा शरणार्थी वा एसाइली रहेकाहरुले परिवारका लागि आवेदन आई ७३० टेक्सास सर्भिस सेन्टरमा मात्र पठाउनुपर्ने भएको छ । यस अगाडि आवेदक बस्ने राज्यका आधारमा टेक्सास सर्भिस सेन्टर वा नेब्रास्का सर्भिस सेन्टरमा पठाउनुपर्ने प्रावधान रहेको थियो ।
अबदेखि भने आवेदन आई ७३० नेब्रास्का सर्भिस सेन्टरमा नपठाउन युएससीआईएसले सुझाव दिएको छ । बढ्दो इलेक्ट्रोनिक वातावरणमा कार्यभारलाई सुव्यवस्थित गर्न फारम आई ७३० को लागि फाइल गर्ने स्थान परिवर्तन गरेको युएससीआईएसले जनाएको छ ।
यो परिवर्तन जनवरी १, २०२३ देखि लागु भएको छ । फारम ७३० को लागि सबै प्रक्रियाहरू र न्यायिक प्रावधानहरुमा भने कुनै परिवर्तन भएको छैन । केवल फाइल गर्ने स्थान मात्र परिवर्तन भएको छ।
नेब्रास्का सर्भिस सेन्टरमा पठाइएका फाइलहरूको लागि ३० दिनको अनुग्रह अवधि प्रदान गरिएको छ । युएससीआईएसले तिनीहरूलाई टेक्सास सर्भिस सेन्टरमा फर्वार्ड गर्नेछ ।
तर जनवरी ३१, २०२३ नेब्रास्का सर्भिस सेन्टरमा पठाइएको कुनै पनि फारम आई ७३० सिधै अस्वीकार गर्ने युएससीआईएसले प्रष्ट पारेको छ । आई ७३० आवेदन दिंदा आवेदनमा रहेका प्रत्येक परिवारको सदस्यको लागि एक पासपोर्ट शैलीको फोटो आवश्यक रहेको तथा आवश्यक फोटो प्रदान नगरेकोमा युएससीआईएसले प्रमाणको लागि अनुरोध जारी गर्ने जनाएको छ । जसले आवेदन प्रकृयामा ढिलाई हुनेछ ।
इलेक्ट्रोनिक वातावरण तर्फ जाने क्रममा युएससीआईएसले इलेक्ट्रोनिक डाटाबेस प्रणालीहरूमा कागजातहरू स्क्यान र अपलोड गर्न सुरु गरेको छ । ढिलाइबाट बच्न र स्क्यानिङ दक्षता सुधार गर्न युएससीआइएसले कागजी फाइलिङका लागि आवेदकलाई विभिन्न सुझावहरु पनि दिएको छ ।
विगत २ वर्ष भित्र अमेरिकामा आएका शरणार्थी वा विगत २ वर्ष भित्र एसाइलम प्रदान गरिएको मुख्य एसाइली रहेको खण्डमा आई ७३० आवेदन दिएर योग्य दम्पत्ति र २१ वर्ष मुनिका अविवाहित बच्चाहरूका लागि फाइल गर्न सकिन्छ । केही अवस्थामा मानवीय कारणहरूका लागि २ वर्षभित्र आवेदन दिनुपर्ने म्यादमा छुट समेत प्रदान गरिन्छ ।
आवेदन पठाउनुपर्ने नयाँ ठेगाना :
USCIS Texas Service Center
Attn: I-730
6046 N. Belt Line Rd. Ste. 730
Irving, TX 75038-0019