न्युयोर्कको उडसाइडमा ७ जना नेपाली पुरुषको समुहबाट एक नेपाली महिलामाथि कुटपिट (भिडियो)
प्रकाशित मिति : पुस २२, २०७९ शुक्रबार
न्युयोर्कको उडसाइडमा ७ जना नेपाली पुरुषको समुहबाट आफूमाथि कुटपिट भएको एक नेपाली महिलाले दावी गरेकी छिन् । गतसाता आफूमाथि राती १ बजेर २० मिनेटमा न्युयोर्क क्वीन्समा ७० स्ट्रीट रुजभेल्ट एभिन्युमा कुटपिट भएको प्रकृति कशांकारले बताइन् ।
आफू सडक छेउमा उभिएको बेला तीनजना नेपाली पुरुषहरुको समुह आएर आफूलाई अपमान जनक शब्दहरु प्रयोग गरेको उनले खसोखासलाई बताइन् । त्यसपछि नजिकै रहेका ४ जना नेपाली भाषी भुटानिज पुरुषहरुले अपमानजनक शब्द प्रयोग गर्ने ३ नेपाली पुरुषहरुलाई सम्झाउन जाँदा उनीहरुबीच विवाद भएको थियो ।
विवादपछि तीनजना नेपालीहरु र ४ जना नेपालीभाषी भुटानिजको समुहबीच हात हालाहाल भएको थियो । केहीबेर हात हालाहालपछि ४ जना नेपाली भाषी भुटानिजको समुह घटनास्थलबाट बाहिर गएको थियो भने तीनजना नेपाली पुरुषको समुहले अरु ४ जना नेपाली पुरुषहरुलाई घटना स्थालमा बोलाएका थिए । त्यसपछि उनीहरुले आफूमाथि कुटपिट गरेको नेपाली महिला कशांकारले बताइन् ।
खसोखासलाई प्राप्त भिडियोमा पनि ४ जना नेपाली भाषी भुटानिजहरु सडक छेउमा उभिएर चुरोट तान्दै गरेको देखिन्छ । त्यसपछि नेपाली महिला र तीनजना नेपाली पुरुषबीच भनाभन भएको जस्तो देखिने स्थानमा ४ जना भुटाजिन पुरुषहरु गएर हस्तक्षेप गरेको देखिन्छ । त्यसपछि उनीहरुबीच हानाहान भएको देखिएको छ । केहीबेर पछि ४ जनाको समुह घटनास्थलबाट बाहिरिएको भिडियोमा देख्न सकिन्छ ।
खसोखासलाई प्राप्त अर्को भिडियोमा घटनास्थलमा रहेका तीनजना नेपालीहरुले अरु ४ जना नेपाली पुरुषहरुलाई बोलाएर महिलामाथि सडकमा आक्रमण गरेको देखिन्छ । महिलामाथि आक्रमणका क्रममा रोक्नका लागि अरु व्यक्ति पनि सहभागी भएको भिडियोमा देखिएको छ ।
आक्रमणबाट आफ्नो शरीरका विभिन्न भागमा चोटपटक लागेको नेपाली महिलाले जानकारी दिएकी छिन् । अनुहार, खुट्टा र हातमा चोटपटक लागेको उनले बताइन् । खसोखासलाई प्राप्त तस्वीरहरुमा उनका हातखु्ट्टा सुन्निएको देखिन्छ भने ओंठमा घाउ लागेको छ ।
घटनाको २ दिनपछि प्रहरीलाई खबर गरेको र प्रहरीले आक्रमणमा संलग्न एक नेपाली पुरुषलाई उडसाइडकै एउटा नेपाली रेष्टुरेण्टमा खाना खाइरहेको बेला पक्राउ गरेको पीडित महिलाले खसोखासलाई बताइन् । आक्रमणमा संलग्न अरु नेपालीहरु न्युयोर्कबाहिरका रहेको र उनीहरु न्युयोर्क छाडेर गइसकेको पीडित महिलाको भनाई छ ।
न्युयोर्क प्रहरीले घटना भएकै दिन आफूहरुलाई घटनास्थलबाट कुनै खबर नआएको र त्यसदिनको घटनाको रिपोर्ट आफूहरुको फाइलमा नरहेको खसोखासलाई बताएको छ । घटनाको दुईदिनपछि प्रहरीलाई खबर गरेपछि पक्राउ परेका भनिएका नेपालीका बारेमा पनि कुनै मुद्दा चलाइने नचलाइनेबारे प्रहरीले केही बताएको छैन ।