आइतबारको दुर्घटनापछि नेपालको असुरक्षित आकाशबारे अन्तर्राष्ट्रिय मिडिया के भन्छन् ?
प्रकाशित मिति : माघ १, २०७९ आईतबार
नेपालमा ७२ यात्रु बोकेको विमान दुर्घटनापछि नेपालको असुरक्षित आकाशबारे विश्वका मिडियामा चर्चा भइरहेको छ । सीएनएनले आइतबारको दुर्घटनाले विश्वको सबैभन्दा जोखिमपूर्ण उडान गर्ने देशको रुपमा चिनिने देशको हवाई यात्राको खतरालाई उजागर गरेको भन्दै समाचार प्रकाशित गरेको छ ।
प्रतिकुल मौसम, कम भिजिबिलिटी र हिमाली भूगोल जस्ता अवस्थाले नेपाललाई उड्नका लागि कुख्यात खतरनाक ठाउँको रूपमा चिनाउन सहयोग गरेको सीएनएनले रिपोर्ट प्रकाशित गरेको छ ।
त्यस्तै रोयटर्सले पहाडी नेपालमा भयानक विमान दुर्घटना हुनु सामान्य भएको भन्दै समाचार प्रकाशित गरेको छ । रोयटर्सले सन् २००० यता भएका विमान दुर्घटनाको विवरणसहित प्रकाशित गरेको छ ।
वासिंटन पोष्टले आइरतबारको दुर्घटनाबारे समाचार प्रकाशित गर्दै युरोपेली संघले सबै नेपाली एयरलाइन्सलाई आफ्नो वायु सुरक्षा सूचीमा समावेश गरेको विषय हाइलाइट गरेको छ । अधिकारीहरूले तिनीहरूलाई अन्तर्राष्ट्रिय सुरक्षा मापदण्डहरूमा स्वीकार नगर्ने र तिनीहरूलाई युरोपमा सञ्चालन गर्न निषेध गरिएको समाचार वासिंटनपोष्टमा छ ।
त्यस्तै बीबीसीले नेपालमा उड्डयन दुर्घटनाहरू असामान्य नभएको तथा दुर्गम रनवे र अचानक मौसम परिवर्तनले खतरनाक अवस्थाहरू बनाउन सक्ने उल्लेख गरेको छ । संसारका सबैभन्दा डरलाग्दा पहाडहरू भएको देश नेपालमा नेभिगेट गर्नका लागि सबैभन्दा कठिन भूभागहरू रहेको बीबीसीको रिपोर्टमा उल्लेख छ ।
त्यस्तै न्युयोर्क टाइम्सले आफ्नो रिपोर्टमा कमजोर भिजिबिलिटी, हिमाली /पहाडी भूभागमा द्रुत रूपमा परिवर्तन हुने मौसमी अवस्था र पूराना जहाजहरू नेपालमा उडानका खतराहरू भएको उल्लेख गरेको छ ।
