न्युयोर्कको जेएफके एयरपोर्टमा डेल्टा र अमेरिकन एयरलाइन्सको विमान ठोक्किनबाट यसरी बच्यो
प्रकाशित मिति : माघ २, २०७९ सोमबार
शुक्रबार बेलुका न्युयोर्कको जोन अफ केनेडी एयरपोर्टमा डेल्टा र अमेरिकन एयरलाइन्सको विमान ठोक्किनबाट थोरैले मात्र बचेको जनाइएको छ । डेल्टा यात्रुले जेएफकेमा रनवेमा उड्ने क्रममा तीब्र गति लिदै गर्दा अगाडि अमेरिकन एयरलाइन्सको विमान पास भएपछि डेल्टाका पाइलटले अचानक ब्रेक लगाएर विमानले टेकअफ रद्द गर्नुपरेको थियो ।
अर्को विमान धावनमार्गमा अघि बढेपछि डेल्टाको विमानले उडान रद्द गर्नुपर्दा विमानमा रहेका यात्रुहरु डराएर चिच्याएका थिए । फेडरल एभिएसन एडमिनिस्ट्रेशनले शुक्रबार राति न्यूयोर्कको जेएफके एयरपोर्टमा डेल्टा बोइङ ७३७ र अमेरिकन एयरलाइन्स बोइङ ७७७ को सन्दर्भमा भएको घटनाको अनुसन्धान गरिरहेको बताएको छ।
डोमिनिकन रिपब्लिकको लागि उड्न लागेको डेल्टा जेटले उडान भर्न रनवेमा तीव्रता दिन थालेको दुई वा तीन सेकेन्डमा अगाडि अर्को विमान पास भएपछि पाइलटले अचानक रोकेर विमान ठोक्किनबाट बचाएका थिए । जसले गर्दा यात्रुहरू उनीहरूको सिटमा अगाडि हुत्तिएका थिए ।
अर्को विमान अगाडिबाट गुज्रिएको र टेक अफ रद्द गर्न बाध्य पारेको पाइलटले यात्रुहरुलाई जानकारी दिएका थिए । विमानलाई उडान रद्द गरेर टर्मिनलमा फर्किन एक घण्टा लागेको थियो । घटना पछि उडान रद्द गरेका यात्रुलाई डेल्टाले पूरै रकम फिर्ता दिएको थियो ।
फेडरल एभिएसन एडमिनिस्ट्रेशनले प्रारम्भिक विश्लेषणमा अमेरिकन एयरलाइन्सको उडान डेल्टाबाट लगभग १ हजार फिट रनवेमा अगाडि बढेपछि डेल्टाले उडान रोकेको देखिएको जनाएको छ । घटनामा कसैलाई चोटपटक लागेको थिएन।
डेल्टा जेटले ११५ माइल प्रतिघण्टाको गति लिएको बेला अचानक रोक्नु परेको थियो । त्यतीबेला उडानमा १४५ यात्रु र छ जना चालक दलका सदस्यहरू थिए। शनिबार बिहान प्रस्थान गर्नुअघि चालक दलका स्रोतसाधनका कारण कर्मचारीले यात्रुहरूलाई विमानबाट उतारेर रातभर बस्न दिएका थिए।
अमेरिकी एयरलाइन्सले भने लन्डनको हीथ्रो एयरपोर्टको लागि योजना अनुसार नै उडान गरेको जनाएको छ ।
