रवि लामिछाने आफ्नै देशमा ‘राज्यविहीन’
प्रकाशित मिति : माघ १३, २०७९ शुक्रबार
नेपालको सर्वोच्च अदालतको फैसलापछि रवि लामिछाने आफ्नै देशमा राज्यविहीन भएका छन् । अर्थात् तत्कालका लागि उनीसँग कुनै पनि देशको बैध नागरिकता छैन । अमेरिकी नागरिकता परित्याग गरिसकेकाले उनले तत्कालै अमेरिकी नागरिकता प्राप्त गर्न सम्भव छैन ।
उनले अमेरिकी नागरिकता प्राप्त गर्न चाहेको खण्डमा उनले अन्य आप्रवासी सरह सुरुबाटै प्रकृया सुरु गर्नुपर्छ । त्यसका लागि उनले सबैभन्दा पहिले अमेरिकाको ग्रिनकार्ड प्राप्त गर्नुपर्छ । अमेरिकी ग्रिनकार्ड प्राप्त गरेको ५ बर्षपछि अमेरिकी नागरिकताका लागि आवेदन दिन सकिन्छ ।
नेपालको नागरिकता प्राप्त गर्नका लागि उनले पुन प्राप्तिको प्रक्रियामा जानु पर्ने हुन्छ। त्यसका लागि उनले अमेरिकी नागरिकता त्यागेको प्रमाण बुझाएर नयाँ नेपाली नागरिकता प्राप्त गर्नसक्ने प्रावधान छ । जुन अमेरिकी नागरिकता पुन प्राप्तीको तुलनामा सहज छ ।
अमेरिकी सरकारको रेकर्ड अनुशार उनले सन् २०१८ को जुलाईदेखि सेप्टेम्बरको तेश्रो क्वार्टरमा अमेरिकी नागरिकता त्यागेका थिए । उनले काठमाडौंमा रहेको अमेरिकी दूतावासमार्फत अमेरिकी नागरिकता त्यागेका थिए ।
सर्वोच्चको फैसलापछि लामिछाने पहिले वंशजको आधारमा नागरिकता भएको र आफै जन्मेको देशमा राज्यविहीन भएका हुन् ।
सर्वोच्चले सांसद पद खारेज भएको फैसला सुनाउँदा लामिछानेले गृह मन्त्रालयमै थिए । सर्वोच्चको फैसलापछि उनी गृह मन्त्रालयबाट बाहिरिएका छन् । उनले सर्वोच्च अदालतको फैसलालाई स्वागत गर्ने बताएका छन् । तर अरू कुनै प्रश्नको जवाफ आफूसँग नभएको बताएका छन् ।
मन्त्रालयबाट बाहिरिने क्रममा उनले भनेका छन् -‘अदालतको फैसलालाई स्वागत गर्छु, स्वीकार गर्छु ।’
शुक्रबार साँझ मन्त्रालयबाट बाहिरिने क्रममा पत्रकारहरूले उनलाई सर्वोच्चको फैसलाबारे प्रश्न गर्दा भने – ‘म अनागरिक छु । कुनै प्रश्नको जवाफ मसँग छैन ।’
