वाशिंगटनका भाग्यशाली व्यक्तिले जिते ७५४ मिलियन डलरको पावरबल लोटरी, कति काटिन्छ ट्याक्स?
प्रकाशित मिति : माघ २४, २०७९ मंगलबार
वाशिंगटन राज्यका भाग्यशाली व्यक्तिले ७५४ मिलियन डलरको पावरबल ज्याकपट जितेका छन् । सोमबार रातीका विजयी नम्बरहरू ५, ११, २२, २३, ६९ र पावरबल नम्बर ०७ रहेका थिए ।
लोटरी अधिकारीहरूले मंगलबार प्रारम्भिक एक विज्ञप्तिमा एउटै टिकट सबै छ नम्बरहरूसँग मेल खाएको बताएका छन् । अत्याधिक टिकट बिक्रीले पहिलेको ७४७ मिलियनको ज्याकपट बढेर ७५४ मिलियन पुगेको थियो ।
बार्षिक रुपमा लिन चाहनले २९ किस्तामा लिन सक्छन् भने एकैपटक लिन चाहनेले ४०७ मिलियन प्राप्त गर्नेछन् । तर त्यसमा ठूलो रकम ट्याक्स कटाइन्छ ।
उक्त रकममा २४ प्रतिशत अनिवार्य संघीय ट्याक्स विथहोल्ड हुन्छ । तर ट्याक्सको श्रृंखला यत्तिमा सिमित हुँदैन । एकल करदाताले शीर्ष संघीय सीमान्त दर ३७ प्रतिशतसम्म तिर्नुपर्छ ।
त्यसपछि राज्य र सिटीका करहरु पनि तिर्नुपर्छ । उक्त करको दर विजेता कहाँ बस्छन् र उनीहरूले जित्ने टिकट कहाँ किनेका थिए भन्ने आधारमा निर्धारण हुन्छ ।
पावरबल चिठ्ठा अमेरिकाका ४५ वटा राज्यहरुमा खेल्न सकिन्छ । साथै वासिंटन डिसी, पोर्तोरिको र युएस भर्जिन आइल्याण्डमा पनि खेल्न सकिन्छ ।
पावरबल लोटरी सोमबार, बुधबार र शनिबार न्युयोर्क समय अनुशार राती १० बजेर ५९ मिनेट जाँदा खोलिन्छ । ज्याकपटक जित्नका लागि २९२ मिलियन टिकटबीच सबैभन्दा भाग्यशाली हुनुपर्छ ।
यो टिकटको मूल्य २ डलर रहेको छ । खेल्ने व्यक्तिले १ देखि १ देखि ६९ सम्मका ५ वटा नम्बर र १ देखि २६ सम्मको एउटा नम्बर छनौट गर्नुपर्छ ।