न्युयोर्कको मेयर कार्यालयबाट नेपालीसहित ५० भाषामा आप्रवासीहरुलाई श्रोत रोडम्याप
प्रकाशित मिति : फाल्गुन ९, २०७९ मंगलबार
न्युयोर्कको मेयर अफिस अफ इमिग्रेन्ट अफेयर्सका कमिश्नर म्यानुएल क्यास्ट्रोले नेपालीसहित ५० भाषाहरूमा नयाँ डिजाइन गरिएको आप्रवासी श्रोत रोडम्याप जारी गरेका छन् । रोडम्यापमा जुनसुकै अध्यागमन स्टाटस भएका सबै न्यूयोर्कवासीहरूका लागि सिटीका स्रोतहरूको सूची र सुरक्षित अधिकारहरू समावेश गरिएको छ।
२ पेजको उक्त श्रोतमा निशुल्क र सुरक्षित अध्यागमन वैधानिक सहायता, आईडीएनवाई कार्ड, निशुल्क अँग्रेजी भाषा कक्षा, स्वास्थ्य सुविधा, मानसिक स्वास्थ्य, आकस्मिकता, सार्वजनिक शिक्षा, सामान्य सिटी श्रोत र जानकारी, आप्रवासी मामिला हटलाइन लगायतका लागि सम्पर्क नम्बर, इमेल र वेवसाइटहरु उपलब्ध गराइएको छ ।
त्यस्तै अध्यागमन जालसाजीबाट बच्न, संघीय अध्यागमन अधिकारीहरु आएमा चाल्नुपर्ने कदम, श्रमिकको अधिकार, भेदभावको रिपोर्ट, घरेलु हिंशाविरुद्ध सुरक्षा, भाडामा बस्नेको अधिकार, बासको अधिकार र उपभोक्ता सुरक्षा लगायतका श्रोत पनि उपलब्ध गराइएको छ ।
नेपाली भाषामा रोडम्याप पढ्न यहाँ क्लीक गर्नुहोला ।
हरेक भाषा समृद्ध संस्कृतिले भरिएको कमिश्नर क्यास्ट्रोको भनाई छ । न्यूयोर्क सिटी पाँच बरोमा बोलिने ४ सयभन्दा धेरै भाषा बिना अदभुत शहर नहुने उनले बताए । अन्तर्राष्ट्रिय मातृभाषा दिवस मनाउने क्रममा न्युयोर्क सिटीले समुदायमा आफ्नै भाषामा सूचनाको पहुँच सुनिश्चित गरेर विविधतालाई मनाउने उनले बताए ।
२१ फेब्रुअरी १९५२ मा बंगलादेशका विद्यार्थीहरूले आफ्नो मातृभाषामा बोल्ने, सिक्ने र शासन गर्ने अधिकारको लागि भाषा आन्दोलन सुरु गरेका थिए । त्यस बेला देखि अन्तर्राष्ट्रिय मातृभाषा दिवस भाषिक र सांस्कृतिक विविधता र बहुभाषिकता प्रवर्द्धन गर्न मनाइने राष्ट्रिय दिवस बन्यो ।
स्थानीय कानून ३० बाट संरक्षित अधिकार अनुशार हरेक न्युयोर्कवासीलाई न्युयोर्क शहरसँग उनीहरूको भाषामा बोल्ने र संलग्न हुने अधिकार छ ।
समुदायको स्वास्थ्य, सुरक्षा, रिकभरी र लचिलोपनका लागि भाषा पहुँच आवश्यक रहेको मेयर अफिस अफ इमिग्रेन्ट अफेयर्सको भनाई छ ।
