अमेरिकाका प्रतिनिधिसभाका सभामुखले ताइवानका राष्ट्रपतिलाई भेट्ने, चीनले फेरि देला सजाय?
प्रकाशित मिति : फाल्गुन २५, २०७९ बिहीबार
ताइवानकी राष्ट्रपति साई इंग-वेनलाई अमेरिकी प्रतिनिधि सभाका सभामुख केभिन म्याकार्थीसँग भेट्न क्यालिफोर्निया भ्रमण गर्न अनुमति दिइने अमेरिकी विदेश मन्त्रालयले संकेत गरेको छ । यसबारे चीनले लगातार विरोध गरिरहेको छ ।
मंगलबार सभामुख म्याकार्थीले साईलाई उनको गृह राज्य क्यालिफोर्नियामा भेट्ने पुष्टी गरेका थिए । अमेरिकाले साईको अमेरिका भ्रमणलाई कम गर्न खोजिरहेको छ किनभने त्यसले सैन्य कारबाही गर्न चीनलाई उक्साउने डर छ।
अमेरिकी विदेश मन्त्रालयका प्रवक्ता नेड प्राइसले साईको यस भ्रमणका लागि टूरको सट्टा ट्रान्जिट शब्द प्रयोग गरेका छन् । प्राइसले उच्चस्तरीय ताइवानी अधिकारीहरु ट्रान्जिटका लागि अमेरिकामा रोकिनु नौलो नभएको र यो लामो समय देखि चलिरहेको बताएका छन् ।
यो अमेरिका र ताइवानबीचको अनौपचारिक र बलियो सम्बन्धसँग मेल खाने उनको भनाई छ । नेड प्राइसले सन् २०१६ देखि साई ६ पटक ट्रान्जिटका लागि अमेरिका आएको बताएका छन् ।
तत्कालीन सभामुख न्यान्सी पेलोसीको अगस्ट २०२२ को भ्रमणपछि चीनले ताइवानमा ठूलो सैन्य अभ्यास गर्नुका साथै क्षेप्यास्त्र परीक्षण गरेको थियो । साथै ताइवानी संस्थाहरूमा धेरै आर्थिक प्रतिबन्ध लगाएको थियो ।
यो भ्रमणले म्याकार्थीलाई ताइपेईको भावी भ्रमणमा ढोका बन्द नगरी ताइवानको लागि उच्च स्तरीय द्विपक्षीय समर्थन प्रदर्शन गर्न अनुमति दिनेछ। यद्यपि चीनले यसबारे ताइवानलाई कुनै न कुनै रुपमा सजाय दिने अनुमान गरिएको छ । तर यसको प्रतिक्रिया सम्भवतः पेलोसीको ताइवान यात्रा पछिको भन्दा कम आक्रमक हुनेछ ।
ताइवानका अधिकारीहरुले अमेरिकालाई ट्रान्जिट बनाएर यात्रा गर्ने अभ्यास सन् १९९४ मा सुरु भएको हो, जब अमेरिकाले ताइवानका तत्कालि राष्ट्रपति ली टेंग हुईलाई निकारागुआ जाने क्रममा हवाईमा ट्रान्जिट बनाउन अनुमति दिएको थियो । साईले आफ्नो राष्ट्रपतिको कार्यकालमा अमेरिकालाई धेरै पटक ट्रान्जिट बनाइसकेकी छिन् । २०१९ मा उनले न्यूयोर्क र डेनभरमा ट्रान्जिट बनाएकी थिइन् ।
यसपटक साईले आफ्नो यात्राको क्रममा क्यालिफोर्नियाको रेगन लाइब्रेरीमा भाषण दिनेछन्। सार्वजनिक भाषणले बेइजिङको आक्रोश तान्ने क्रममा साईले २०१९ ट्रान्जिटको समयमा कोलम्बिया विश्वविद्यालयमा पनि बोलेकी थिइन् । अमेरिकामा अन्य बेला ट्रान्जिट बनाउँदा पनि उनले बोल्ने गरेकी छिन् ।