बाल्यकालमा बुवा गुमाएकी न्युयोर्ककी उर्मिलाको ‘मेरो बुवाको घर’, १३ बर्षपछिको गायनयात्रा निरन्तर
प्रकाशित मिति : बैशाख २६, २०८० मंगलबार
न्युयोर्क निवासी गायिका उर्मिला लाम्गादेको नयाँ गीत ‘मेरो बुवाको घर’ भिडियोसहित सार्वजनिक भएको छ । अमेरिकामा छायाँकन गरिएको यस भिडियोलाई विक्की पुलामीको छायाँकन र निर्देशनमा तयार पारिएको हो । यस अगाडि यो गीत रोहित थापाले गाएका थिए ।
१३ बर्षको लामो अन्तरालपछि झण्डै तीनबर्ष अगाडि गायन यात्रामा फर्किएकी उनका यो अवधिमा झण्डै आधा दर्जन गीतहरु सार्वजनिक भइसकेका छन् । यस अगाडि उनका माया बैगुनी, ताजाताजा, लिन आउँछु भन्थ्यौ, समान सबै जात हजुर लगायतका गीतहरु आइसकेका छन् ।
हेटौंडा रातामाटेमा जन्मिएकी उनी बच्चैदेखि अभिनयमा समेत रुची राख्थिन् । तर उक्त शौख पूरा गरिदियो टेलिचलचित्र दलनले । जातीय विभेदबिरुद्धको उक्त टेलिचलचित्र झण्डै १३ बर्षअगाडि रिलिज भएको थियो ।
दलनमा उनले दलितभित्रको पनि अन्तरजातीय जोडीका रुपमा अभिनय गरेकी छिन् । दलनमा नैना नामको पात्रको अभिनय गरेकी उनी म्युजिक भिडियोमा समेत देखिएकी थिइन् । त्यस्तै टेलिभिजनका केही चेतनामुलक विज्ञापनहरुमा पनि अभिनय गरिन् । स्वास्थ्य मन्त्रालयले निर्माण गरेको उक्त विज्ञापन नेपाल टेलिभिजनबाट खुब बज्यो ।
अभिनयमा रुची भएपनि सन् २०११ मा उनी अमेरिका आएकाले अभिनययात्रालाई अगाडि बढाउन सकिनन् । अब बच्चाहरु पनि हुर्किसकेकाले गायनयात्रालाई अगाडि बढाउनमा सहज वातावरण भएको उनी बताउँछिन् ।
विभिन्न कार्यक्रममा गाउने र बच्चैदेखि गाउने भएपनि गायनयात्रामा अगाडि बढ्नमा विभिन्न कुराले पछि परेको बताउँछिन् उनी । उनले बुबालाई बच्चैमा गुमाउनुपरेको थियो । झण्डै १६ बर्ष अगाडि आमालाई पनि गुमाउनुपर्यो ।