नेपालका माओवादीहरुको भिसाबारे अमेरिकाले अब तुरुन्तै निर्णय गर्ने
प्रकाशित मिति : जेष्ठ ७, २०८० आईतबार
नेपालका माओवादीहरुको भिसाबारे अमेरिकाले अब तुरुन्तै निर्णय गर्ने भएको छ । यस अगाडि उनीहरुको भिसाका लागि राष्ट्रिय सुरक्षाका आधारमा थप जाँचबुझका लागि प्रशासनिक प्रकृयामा लामो समय लाग्दै आएको थियो । यो प्रकृयाका लागि केहीसातादेखि कैयन महिनासमेत लाग्ने गरेको थियो ।
खासगरी विगतमा माओवादीमा संलग्न भएकाहरु वा अहिले पनि माओवादी पार्टीका सदस्य रहेकाहरुका लागि अमेरिकाको भिजिटर भिसा पाउनका लागि राष्ट्रिय सुरक्षामा खतरा नरहेको प्रमाणित गर्नुपर्ने अवस्था विद्यमान रहेको छ । माओवादीलाई विगतमा अमेरिकाले आतंककारीको सुचीमा राखेकाले अमेरिकाको राष्ट्रिय सुरक्षामा खतरा नभएको क्लीयरेन्स पाउनुपर्ने अवस्था रहेको हो । भिसाका लागि क्लीयरेन्स पाउन लामो प्रकृया अपनाउनुपर्ने भएकाले प्रशासनिक प्रकृयामा लामो समय लाग्दै आएको थियो ।
तर सन् २०२२ को अक्टोबरदेखि भने पहिले अतिरिक्त प्रशासनिक आवश्यक भएका भिसाका आवेदनहरु समय नलगाइकन तुरुन्तै समाधान गरिदै आएको अमेरिकी विदेश मन्त्रालय ब्यूरो अफ कन्सुलर अफेयर्सले जनाएको छ । माओवादी पार्टीका सदस्यबाहेक अन्यको भिसामा समेत अतिरिक्त राष्ट्रिय सुरक्षा छानविन गर्न सकिने प्रावधान रहेको छ ।
अमेरिकी विदेश मन्त्रालयले राष्ट्रिय सुरक्षा जिम्मेबारीहरु कायम राख्दै पहिलेभन्दा अझ प्रभावकारी रुपमा भिसाहरु प्रशोधन गरिरहेको जनाएको छ । थप सुरक्षा जाँचसहित भिसा जारी गर्नु अगाडि लिनुपर्ने अतिरिक्त कदमहरुका लागि प्रशासनिक प्रकृयाको समय कम गरिएको विदेश मन्त्रालयले जनाएको छ ।
हालै नयाँ प्रविधिको प्रयोग गरेर सुरक्षाका आधारमा प्रशासनिक प्रकृया आवश्यक पर्ने भिसा आवेदनहरुको संख्या घटाउन समन्वय बढाइएको विदेश मन्त्रालयले जनाएको छ । अर्थात् अब गम्भिर सुरक्षा खतरा भएका बाहेक अन्य आवेदनहरुका सन्दर्भमा प्रशासनिक प्रकृयामा नलगी तुरुन्तै भिसाबारे निर्णय गरिनेछ भने गम्भिर सुरक्षा खतराका आशंका भएका आवेदनमात्र प्रशासनिक प्रकृयामा लगिनेछ ।
अमेरिकी विदेशमन्त्रालयले संघीय सरकारका साझेदारहरुसँग राष्ट्रिय जाँच केन्द्रमार्फत समन्वय गर्ने र त्यसले प्रशासनिक प्रकृयाका लागि पर्खने भिसा आवेदकको संख्या नाटकीय रुपमा घटाएको विदेश मन्त्रालयले जनाएको छ । पहिले लामो प्रशासनिक प्रकृया आवश्यक पर्ने भिसा आवेदनका लागि पनि गत अक्टोबरदेखि तुरुन्तै निर्णय गर्ने गरिएको छ ।
राष्ट्रिय सुरक्षा उच्च प्राथमिकता रहेको तथा कुनै पनि भिसा जारी गर्नु अगाडि प्रत्येक सम्भावित यात्री सुरक्षा जाँचको कडा अधिनमा रहेको सुनिश्चित गर्ने विदेश मन्त्रालयले जनाएको छ । अब यो काम धेरै व्यवस्थीत र छोटो समयमा नै गर्न सकिने भएको विदेश मन्त्रालयको भनाई छ ।
