अमेरिकामा विद्यार्थी भिसामा आउनेहरुलाई आइसले दियो यस्तो चेतावनी
प्रकाशित मिति : जेष्ठ ८, २०८० सोमबार
पढाई सुरु हुनुभन्दा ३६५ दिन अगाडिसम्म विद्यार्थी भिसा जारी गर्न सकिने भएतापनि अमेरिका प्रवेश भने पढाई सुरु हुनुभन्दा ३० दिन अगाडिसम्ममात्र गर्न सकिनेबारे अमेरिकाको इमिग्रेशन एण्ड कस्टम इन्फोर्समेन्ट आइसले प्रष्ट पारेको छ । गत फेब्रुअरीमा अमेरिकी विदेश मन्त्रालयले कन्सुलरलाई अद्यावधिक मार्गदर्शन प्रदान गर्दै पढाई सुरु हुनुभन्दा बढीमा ३६५ दिन अगाडिसम्म भिसा जारी गर्न सक्ने निर्देशिका जारी गरेको थियो ।
यो नयाँ निर्देशनले आई २० जारीका प्रावधानहरु लगायतका विषयमा कुनै परिवर्तन नगर्ने भएतापनि विद्यार्थीहरूले उनीहरुको आई २० मा उल्लेख भएको कार्यक्रम सुरु हुने मितिभन्दा ३० दिन अघि मात्रै अमेरिका प्रवेश गर्न सक्नेमा जोड दिएको छ । ३० दिनभन्दा अगाडि नै अमेरिका प्रवेश गर्नखोज्ने विद्यार्थीहरुलाई विमानस्थलबाट सीबीपीले फर्काउन सक्ने आइसले चेतावनी दिएको छ ।
अमेरिका मा सहज प्रवेश सुनिश्चित गर्न मद्दत गर्न, विद्यार्थी र विद्यालय अधिकारीहरूले प्रवेशको अमेरिकी पोर्टमा आइपुग्नु अघि विद्यार्थीहरूसँग उनीहरुले यात्रा गरिरहेको फारम आई २० मा सक्रिय आई ९०१ सेभिज शुल्क भुक्तानी भएको, फारम आइ २० मा रहेको विद्यालयको नाम भिसामा रहेको विद्यालयको नामसँग मेल खाएको र विद्यार्थी वित्तीय जानकारी सेभिजमा अप टु डेट रहेको सुनिश्चत गर्नुपर्ने आइसले जनाएको छ ।
अमेरिकी विदेश मन्त्रालयले निश्चित गैरआप्रवासी भिसा आवेदनमा वृद्धिको घोषणा गर्दै अन्तिम नियम प्रकाशित गरेको पनि आइसले स्मरण गराएको छ । जस अनुशार मे ३० देखि विद्यार्थी भिसा शुल्क १६० डलरबाट बृद्धि भएर १८५ डलर हुनेछ ।