न्युयोर्कमा ६ जना बालिकाहरूको सामुहिक बेलविवाह (इहि)
प्रकाशित मिति : असार २, २०८० शनिबार
नेवा: नख: न्यूयोर्कको आयोजनामा आठौं सामुहिक इहि कार्यक्रम न्यूयोर्कमा सम्पन्न भएको छ । नेवा: गुभाजु समन्त बज्राचार्यले नेवा: विधिपूर्वक इहि सम्पन्न गराएका हुन् । गुरूमा पुष्पा बज्राचार्य र नेवास् नख: अध्यक्ष महेन्द्र बीर बज्राचार्य र निर्वतमान अध्यक्ष तथा सल्लाहाकार विष्णु मान प्रधानले जजमान भै पुजा सम्पन्न गर्न सहयोग गरे ।
न्युयोर्कको ज्याक्सनहाइटमा रहेको शेर्पा किदुगको भवनमा गरिएको सामुहिक इहिमा न्युयोर्क, फिलाडेल्फिया, कोलराडो र मिनसोटाबाट ६ जना बालिकाहरूको सहभागी थियो । इहि गरिएका बालिकाहरू लसता बज्राचार्य, हेभेन महर्जन, रूवी मे महर्जन अवाले, शनाया डंगोल, आर्या रंजितकार र आर्जा नानी बज्राचार्य लगायत उक्त कार्यक्रममा बालिकाका अभिभावक आफन्तकहरू लगायतको उपस्थिति थियो ।
यस्ता कार्यक्रमबाट विदेशमा रहेर पनि नेवारी मौलिक संस्कृति र परम्पराको समेत संरक्षण र प्रवर्द्धन हुने नेवा: नख: न्युयोर्कका निर्वतमान अध्यक्ष तथा सल्लाहाकार बिष्णु मान प्रधानले जानकारी दिए ।
नेवाः जातीमा बालिका रजश्वला हुनु अगाडी इहि गराउने प्रचलन छ। “इ” भनेको नेपाल भाषामा समय हो र “हि” भनेको रगत हो अर्थात रगत देखा पर्नु अगाडी गर्नु पर्ने संस्कार नै इहि संस्कार हो । इहि गर्ने बालिका दिनभरी व्रत बसेर बेल लगायत कलश, बज्र, चक्रआदिको पूजाआजा गर्दछन् । विधिवत रूपमा पूजाआजा गरी इहि गर्ने गर्ने बालिकाका बुवाले ईष्ट देवतासंग बिधिवत् रूपमा सम्बन्ध गास्ने काम गरेपछि यो इहि कार्य सम्पन्न हुने गर्दछ ।
नेवार जातिमा बेल जस्तो भयो दुलहीको वर पनि उस्तै हुने विश्वास छ । इहि संस्कार भएपछि विजोर वर्षमा बाह्र दिनसम्म बाह्रा राखेपछि सूर्यदर्शन गराइन्छ र वयस्क भएपछि बरसँग विवाह गराइन्छ । सती प्रथा उन्मुलन गर्नका लागि इहिको परम्परा आरम्भ भएको थियो।
