मिजौरीमा नेपालीको सुन्दर परिवारमा विपद, दुर्घटनामा चारैजना घाइते, सहयोगका लागि गोफण्डमी
प्रकाशित मिति : असार २२, २०८० शुक्रबार
अमेरिकाको ओक्लाहोमामा भएको दुर्घटनामा मिजौरीमा बस्दै आएको नेपाली परिवारका सबैजना घाइते भएपछि उक्त सुन्दर परिवारमा विपत आइलागेको छ । सन्तोष बर्तौला, श्रीमती श्रृजना पाण्डे, ६ बर्षका छोरा जस बर्तौला र २ बर्षकी छोरी नायला बर्तौला चढेको गाडीमा सेमी ट्रकले ठक्कर दिंदा परिवारका चारैजना घाइते भएका हुन् भने दुईजनाको अवस्था गम्भिर रहेको छ ।
यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
शनिबार बेलुका ५ बजेतिर भएको दुर्घटनामा घाइते आमा र छोरीको अवस्था गम्भिर रहेको छ । आमाको स्पाइनल कर्ड इन्जुरी भएकाले प्यारालाइसिस अवस्थामा उपचार भइरहेको छ भने छोरीको पनि गम्भिर र अचेत अवस्थामा ब्रेन हेमरेजका साथ आईसीयुमा उपचार भइरहेको छ । श्रृजनाले कम्तीमा पनि एकबर्ष बेडरेष्ट गर्नुपर्ने अस्पताललाई उद्दृत गर्दै परिवारले जनाएको छ । सन्तोष बर्तौला र छोरा जस बर्तौलाको पनि शरीरका केही भागका हड्डीहरु टुटेको तर खतरामुक्त अवस्थामा उपचार भइरहेको छ ।
आफूहरुलाई आर्थिक, भावनात्मक र मानसिक रूपमा तनाव उत्पन्न भएको उल्लेख गर्दै सन्तोष बर्तौलाले आर्थिक सहयोग जुटाउन गोफण्डमी सुरु गरेका छन् । आफू सधैं मानवीय क्षेत्रमा संलग्न हुने गरेको र आज आफैले असहाय पीडित भएको महसुस गरिरहेको उल्लेख गर्दै उनले सबैसँगको सहयोगको अनुरोध गरेका छन् । अहिले आफ्नो उपचार र श्रीमती तथा बच्चाहरूको सहयोग गर्नुपर्ने भएकाले काममा जान नसकेको भन्दै उनले आर्थिक रूपमा मद्दत गर्न र आफूहरुका लागि प्रार्थना गरिदिन आग्रह गरेका छन् ।
ओक्लाहोमाको शुटोभन्ने स्थानमा गाडी चलाइरहँदा सेमी ट्रकले ठक्कर दिएपछि उनीहरु घाइते भएका हुन् । आमाछोरीलाई एयर एम्बुलेन्समार्फत र बाबुछोरालाई एम्बुलेन्समार्फत टल्सामा रहेको सान फ्रान्सिस अस्पतालमा लगिएको थियो । त्यसपछि उसैदिन श्रृजना पाण्डेको घाँटीको सर्जरी गरिएको थियो ।
अहिले आमाछोरी आफ्नो जीवनको लागि लडिरहेका छन् भने छोरीको मस्तिष्कमा गहिरो चोट लागेको छ । आमाको सी४, सी ५ र सी ६ स्पाइनल कर्ड भाँचिएको छ, जुन जुन मेरुदण्डको सबैभन्दा गम्भीर चोटहरू मध्ये एक हो । छोराको केही दिनमा कस्मेटिक सर्जरी हुनसक्ने अस्पताललाई उद्दृत गर्दै पारिवारिक श्रोतले जानकारी दिएको छ ।
कोलम्बियाको मिजौरीमा बस्दै आएको बर्तौला परिवार केहीसमय अगाडिमात्र अमेरिका आएको हो । झण्डै एकबर्ष अगाडि अमेरिका आएका सन्तोष बर्तौलाले गतबर्षको अक्टोबरमा डिपेन्डेन्टका रुपमा श्रीमती र छोराछोरीलाई अमेरिका ल्याएका थिए । नेपालमा स्थायी घर हेटौडा भएका उनीहरु गत शुक्रबारपछि जुलाई ४ को लामो सप्ताहन्तविदा भएका कारण साथीलाई भेट्न सन्तोष आफैले गाडी चलाएर टेक्सास जाँदै थिए । त्यसैक्रममा बीच बाटोमा दुर्घटना भएको हो ।
