न्युयोर्कमा छुरा प्रहारबाट सख्त घाइते उबर/लिफ्ट चालक यादव ढुंगेलको सहयोगका लागि गोफण्डमी
प्रकाशित मिति : श्रावण ५, २०८० शुक्रबार
न्युयोर्क सिटीमा गत साता छुरा प्रहारबाट सख्त घाइते ३६ बर्षका लिफ्ट तथा उबर चालक यादव कुमार ढुंगेलको सहयोगका लागि गोफण्डमीमा आर्थिक अभियान सुरु गरिएको छ । राजेश भनेर समेत चिनिने ढुंगेलमाथि एफडीआर ड्राइभमा लिफ्ट चलाइरहँदा गाडीमा चढेका एक व्यक्तिले पटकपटक छुरा प्रहार गरेर कारज्याकको प्रयास गरेका थियो । दुई सन्तान र श्रीमती रहेका ढुंगेलको अवस्था अहिले स्थीर रहेपनि झण्डै ८ महिनासम्म आराम गर्नुपर्ने चिकित्सकले सुझाव दिएका छन् ।
घरमा आम्दानी गर्ने मुख्य व्यक्ति घाइते भएपछि मेडिकल बिल, मोर्गेज पेमेन्ट र अन्य खर्चका लागि सहयोगको आवश्यकता परेको हो । यो समाचार तयार पार्दासम्म जम्मा ४ हजार ६ सय ३२ डलर संकलन भएको छ । छुरा प्रहारबाट सख्त घाइते ढुंगेलको आईसीयुमा उपचार गरिएको थियो । उनको शल्यकृया गरिएको थियो भने दुईदिनपछि स्थीति स्थीर रहेको चिकित्सकले जानकारी दिएका थिए । ढुंगेलको छाती, काँध र हातमा छुरा प्रहार गरिएको थियो ।
यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
ढुंगेललाई छुरा प्रहार गरेर लुटपाटको प्रयास गर्ने संदीग्ध २० बर्षीय इस्माइल इंग्लिशलाई प्रहरीले पक्राउ गरिसकेको छ । आक्रमणकारीले ढुंगेलको सिटमा बस्ने प्रयास गर्दै कारज्याकको प्रयास गरेको थियो । आक्रमणकारीलाई हत्याको प्रयास, डकैतीको प्रयास, खतरनाक लापरवाही र हतियारको आपराधिक कब्जाको चारवटा अभियोग लगाएको छ ।
घटना गत साताको मंगलबार दिउँसो २ बजेर ४० मिनेटमा भएको थियो । एफडीआर ड्राइभको दक्षिणपट्टि म्यानहट्टन ब्रिज एक्जिटमा पुग्दै गर्दा लिफ्टको राइड शेयरमा रहेको इस्माइल इंग्लिशले कारज्याकको प्रयास गरेको थियो । ढुंगेलले अस्वीकार गरेपछि उसले तीनपटकसम्म छुरा प्रहार गरेको प्रहरीले जनाएको छ ।
छुरा प्रहारपछि संदिग्धले एफडीआर ड्राइभमा घटनास्थलबाट भाग्ने प्रयास गरेको र सेतो सेडानमा हामफालेको थियो । अर्को कारमा हामफालेर अर्को ड्राइभरसँग कुश्ती गर्न थालेको थियो । अरू कसैको कारमा चढ्न खोजेपनि अरू कसैको कारमा चढ्न भने सकेन । भाग्ने क्रममा माथिबाट तल साइकल लेनमा हाम्फाल्दा उसको दुबै खुट्टा भाँचिएको थियो । त्यसपछि आक्रमणकारीलाई हिराशतमा लिइएको थियो । आक्रमणकारीलाई हिराशतमा लिएपछि बेल्लेभ्यु अस्पताल लगिएको थियो ।