बाइडेन प्रशासनबाट कागजपत्रविहिनलाई देशनिकालामा बृद्धि, मे ११ यता ८५ हजार ‘डिपोर्ट’
प्रकाशित मिति : श्रावण १२, २०८० शुक्रबार
डिपार्टमेन्ट अफ होमल्यान्ड सेक्युरिटीका अनुसार टाइटल ४२ हटाएपछि करिब ८५,००० आप्रवासीहरूलाई अमेरिकाबाट देशनिकाला गरिएको छ। जुन गत वर्षको सोही अवधिको तुलनामा ६५ प्रतिशतले बढी हो ।
राष्ट्रपति बाइडेनले मे मा टाइटल ४२ को रूपमा चिनिने महामारीकालिन सीमा प्रतिबन्ध हटाएपछि सरकारी अधिकारीहरूले अमेरिका आउने आप्रवासीहरूको संख्यामा ठूलो वृद्धि हुने अपेक्षा गरेका थिए । तर त्यस्तो परिदृश्यहरू भने देखा परेन । बाइडेन प्रशासनले मे देखि अवैध सीमा क्रसिङहरूमा ४२ प्रतिशत गिरावटको दावी गरिरहेको छ।
तर सीमानाको वास्तविकता केही फरक छ । सीबीपी वान को प्रयोग लगायतका माध्यमबाट अमेरिकामा आउने कागजपत्रविहिन आप्रवासीहरूको संख्या अझै पनि उच्च रहेको छ । र बाइडेन प्रशासनले पनि देशनिकाला बढाइरहेको छ।
रियो ग्रान्डे उपत्यकाको एयरपोर्टमा बुधबार बिहान १०० भन्दा बढी कागजपत्रविहिन आप्रवासीहरू बसबाट बाहिर निस्केर चार्टर्ड विमानमा चढिरहेका थिए। उनीहरुलाई होन्डुरसमा फिर्ता पठाइदै थियो । उनीहरुमध्ये प्रायः महिला र बालबालिकाहरु थिए ।
आइस एयरद्वारा सञ्चालित उडान कार्यक्रमले कागजपत्रविहिन आप्रवासीहरूलाई तिनीहरूको देशमा फिर्ता पठाउन विभिन्न राज्यहरूबाट प्रत्येक हप्ता धेरै विमानहरू चार्टर गर्दछ।
यसरी नै टाइटल ४२ हटाएपछि करिब ८५,००० आप्रवासीहरूलाई स्वदेश फिर्ता गरिसकिएको छ । अघिल्लो वर्षको सोही अवधिमा ३३ हजार ८७ स्वदेश फिर्ता भएको तथ्यांक छ ।
यसले विना भिसा अमेरिकामा आउने र अनुचित रूपमा शरण खोज्नुको नतिजाको बारेमा स्पष्ट सन्देश दिने आइसको हार्लिंगेन क्षेत्रीय कार्यालयका निर्देशक मिगेल भेर्गाराले बताएका छन् ।
थप आप्रवासी क्रसिङहरूलाई पनि कानुनी रूपमा वर्गीकृत गरिएको छ किनभने तिनीहरूले मोबाइल एपमा पोर्ट अफ एन्ट्रीमा स्क्रिनिङ अपोइन्टमेन्टहरू तय गरिरहेका छन्। अझै पनि दक्षिणी सीमा पार गर्ने बालबालिकासहित आप्रवासी परिवारको संख्या विगत दुई महिनामा झण्डै तीन गुणाले बढेको छ, जसले क्रसिङमा अर्को समग्र वृद्धिको चिन्ता बढाएको छ।
आप्रवासीहरुलाई सीमामा पुग्नको लागि कानुनी मार्गहरू विस्तार गर्ने र सीमामा अनियमित रूपमा आउनेहरूलाई कारवाही गर्ने दृष्टिकोणले काम गरिरहेको होमल्याण्ड सेक्युरिटी सेक्रेटरी अलेहान्द्रो मेयोर्कासले बुधबार सदन न्यायिक समितिमा बताएका थिए । तर उनको आश्वासनलाई रिपब्लिकन सांसदहरूले शंकाको साथ हरेका थिए, जसमध्ये धेरैले उनको महाभियोगको लागि आह्वान गरिरहेका छन् र उनले आफ्नो काम नगरेको बताएका छन्।
मेयोर्कासको गवाही संघीय न्यायाधीशले बाइडेन प्रशासनको एसाइलम नीतिमा रोक लगाउने आदेश दिएको एक दिन पछि आएको हो । न्यायाधिसले। १४ दिनको लागि आफ्नो निर्णय रोकेका छन् भने बाइडेन प्रशासनले अदालतको फैसलाको पुनरावेदन गरेको छ ।
बाइडेन प्रशासनले अध्यागमन प्रक्रिया अब थप व्यवस्थित भएको दावी गर्दै आएको छ। तर अवैध क्रसिङमा गिरावट भ्रामक रहेको आलोचकहरूको भनाई छ । आप्रवासीहरूलाई पोर्ट अफ इन्ट्रीमा धकेलिएको र अहिले मात्र फरक वर्गीकरण गरिएको आलोचकहरुको भनाई छ ।
विना भिसा अमेरिका आउँदा अहिले सीबीपी वान मोबाइल एप प्रयोग गरेर स्क्रिनिङ अपोइन्टमेन्टहरू लिन आवश्यक छ । यो एप मे मा अद्यावधिक गरिएको थियो र थप अपोइन्टमेन्टहरू थपिएका थिए। भन्सार तथा सीमा सुरक्षा विभागका एक वरिष्ठ अधिकारीका अनुसार संघीय अधिकारीहरूले अहिले दक्षिणी सीमामा दैनिक १ हजार ४५० अपोइन्टमेन्ट बुकिङ गरिरहेका छन्।
थप ५ सय सीबीपी अधिकारीहरू दक्षिणी सीमामा पठाइएको छ। अधिकारीका अनुशार अधिकांश आप्रवासीहरूले आठ हप्ता भित्र अपोइन्टमेन्टहरू पाइरहेका छन् ।