क्यालिफोर्नियामा डेढ महिनाको बच्चा रोएको भन्दै दुधको बोतलमा रक्सी हालेर दिने आमा पक्राउ
प्रकाशित मिति : श्रावण २३, २०८० मंगलबार
क्यालिफोर्नियाकी एउटी आमालाई बालकलाई दुधको बोतलमा रक्सी हालेर खुवाएको आरोपमा पक्राउ गरिएको छ । ६ हप्ताको बच्चाको जाँच गर्दा रक्सी पिएको फेला परेपछि प्रहरीले अनुसन्धान सुरु गरेको थियो ।
सन बर्नार्डिनो काउन्टी प्रहरीका अनुशार ३७ वर्षीय होनेस्टी डे ला टोरेविरुद्ध बच्चालाई खतरामा पारेको अभियोग लगाइएको छ। प्रहरीलाई कसैले फोन गरेर लस एन्जलसबाट ५५ माईल पूर्व रियाल्टोको एक क्षेत्रमा बोलाएका थिए ।
प्रहरीले बच्चालाई मादक अवस्थामा फेला पारेको अधिकारीहरूले बताएका छन् । अधिकारीहरूका अनुशार डे ला टोरेले रियाल्टो हुँदै ड्राइभ गरिरहेकी थिइन् । र बच्चालाई रुनबाट रोक्नको लागि दुघको बोतलमा रक्सी हालेर दिएकी थिइन् ।
त्यसपछि बच्चा नशामा परेको जनाइएको छ । बालकको अहिलेको अवस्था भने खुलाइएको छैन । डे ला टोरेलाई वेस्ट भ्याली डिटेन्सन सेन्टरमा ६० हजार डलर धरौटी तोकेर राखिएको छ। उनलाई मंगलबार अदालतमा पेश गर्ने तालिका थियो ।