सेप्टेम्बर १३ देखि एसाइलम अन्तरवार्तामा यी योग्यता भएका नेपाली भाषा अनुवादक लैजानु पर्ने
प्रकाशित मिति : भाद्र २७, २०८० बुधबार
भोलि सेप्टेम्बर १३ देखि युएससीआईएसमा एसाइलम अन्तरवार्तामा जाँदा दोभाषे चाहिनेले आफैले नेपाली भाषा अनुवादक लैजानु पर्ने भएको छ । सेप्टेम्बर १२ सम्म नेपाली भाषा अनुवादक सरकारले नै निशुल्क प्रदान गर्दै आएकोमा सेप्टेम्बर १३ देखि अङ्ग्रेजीमा अन्तर्वार्ता दिन नसक्ने एसाइलम आवेदकहरूले आफ्नै दोभाषेहरू उपलब्ध गराउनु पर्नेछ ।
कोरोनाको महामारीका कारण सन् २०२० को सेप्टेम्बरदेखि भाषा अनुवादक लैजान नपर्ने नियम लागु गरिएको थियो । कोरोना सम्बन्धित सार्वजनिक स्वास्थ्य आपतकालको संघीय घोषणा मे २०२३ मा समाप्त भइसकेको छ । त्यसपछि धेरै सरकारी अभ्यासहरु पहिलेकै अवस्थामा आइरहेका छन् ।
अब एसाइलम आवेदकलाई भाषा अनुवादकको आवश्यकता परेको खण्डमा आफै शुल्क तिरेर लैजानुपर्नेछ । यदि आवेदकको अँग्रेजी राम्रो छैन र दोभाषे चाहिएको छ तर दोभाषे ल्याएको छैन भने वा दोभाषे अंग्रेजी र आवेदक बोल्ने भाषामा धाराप्रवाह छैन भने युएससीआईएसले आवेदक अन्तर्वार्तामा उपस्थित हुन असफल भएको मानेर एसाइलम अन्तर्वार्ता खारेज गर्न सक्ने वा एसाइलम आवेदन अध्यागमन न्यायाधीशलाई रिफर गर्ने युएससीआईएसले जनाएको छ ।
यदि दोभाषे ल्याउन नसक्नुको राम्रो कारण पेश गर्न सकेको खण्डमा भने आवेदकले अन्तरवार्ताको अर्को मिति पनि पाउनसक्नेछन् । आवेदन अनुशार यसबारे निर्णय गर्ने युएससीआईएसले प्रष्ट पारेको छ ।
- अनुवादक अङ्ग्रेजी र आवेदकले बोल्ने भाषामा धाराप्रवाह हुनुपर्छ भने कम्तिमा १८ वर्षको हुनु पर्छ।
- अनुवादक आवेदकको वकील वा मान्यता प्राप्त प्रतिनिधि हुनुहुदैन ।
- अनुवादक आवेदकको तर्फबाट गवाही दिने साक्षी हुनुहुदैन ।
- अनुवादक आवेदकको राष्ट्रियता भएको देशको सरकारको प्रतिनिधि वा कर्मचारी, आवेदक राज्यविहीन भएमा अन्तिम पटक बसेको देशको सरकारको प्रतिनिधि वा कर्मचारी हुनुहुदैन ।
- अनुवादक अहिलेसम्म अन्तर्वार्ता नभएको पेन्डिङ एसाइलम आवेदन भएको व्यक्ति हुनुहुदैन ।