कसले फाइल गर्ने अक्टोबरमा परिवारमा आधारित ग्रिनकार्ड? कसले पाउनेछन् भिसा अप्वाइन्टमेन्ट?
प्रकाशित मिति : भाद्र २९, २०८० शुक्रबार
अमेरिकी सरकारको विदेश मन्त्रालय ब्यूरो अफ कन्सुरल अफेयर्सले जारी गरेको अक्टोबरको भिसा बुलेटिन अनुशार परिवारमा आधारित कुनै पनि श्रेणीको ग्रिनकार्ड अक्टोबरमा करेन्ट नहुने भएको छ । युएससीआईएसले पनि सोही फाइलिङ मितिलाई नै आधार मानेकाले कुनै पनि श्रेणीमा अमेरिकामा हुनेले आई १३० आवेदनका साथमा ग्रिनकार्ड आवेदन आई ४८५ फाइल गर्न पाइने छैन ।
भिसा बुलेटिन अनुशार ग्रिनकार्डवाहकका दम्पत्ति र २१ बर्ष नपुगेका छोराछोरीको ग्रिनकार्ड अक्टोबरमा पनि करेन्ट नहुने भएको छ । अर्थात् अमेरिकामा हुने ग्रिनकार्डवाहकका दम्पत्ति र छोराछोरीहरुले अक्टोबरमा आई १३० आवेदनका साथमा एकसाथ आई ४८५ ग्रिनकार्ड आवेदन फाइल गर्न पाउनेछैनन् ।
अक्टोबरमा ग्रिनकार्डवाहकका दम्पत्ति र २१ बर्ष नपुगेका छोराछोरीहरुका लागि ग्रिनकार्ड फाइल गर्न वा नेशनल भिसा सेन्टरले प्रकृया अगाडि बढाउन आवेदनको प्राथमिकता मिति सेप्टेम्बर १ २०२३ भन्दा अगाडिको हुनुपर्नेछ । अमेरिकाबाहिर हुनेहरुका सन्दर्भमा ८ फरबरी २०१९ भन्दा अगाडि प्राथमिकता मिति हुनेहरुलेमात्र दूतावासमा भिसाका लागि अन्तरवार्ताको अप्वाइन्टमेन्ट पाउन सक्नेछन् । सेप्टेम्बरको तुलनामा यो मिति १ बर्ष १ महिना कम भएकाले थोरै राहत मिलेको छ । अर्थात् फाइल गरेको मितिले ४ बर्ष ८ महिनामा आप्रवासी भिसा (ग्रिनकार्ड) पाउन सकिनेछ ।
अब्टोबरको भिसा बुलेटिन अनुशार अमेरिकी नागरिकका अविवाहित छोराछोरीहरुले ग्रिनकार्ड पाउनका लागि लाग्ने अवधि ८ बर्ष १० महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ सेप्टेम्बर २०१७ भन्दा अगाडि प्राथमिकता मिति भएको आवेदनलाई अब्टोबरमा नेशनल भिसा सेन्टरले अगाडि बढाउनेछ । तर भिसाको अप्वाइन्टमेन्ट पाउन भने आवेदनको प्राथमिकता मिति १ जनवरी २०१५ भन्दा अगाडिको हुनुपर्छ ।
ग्रिनकार्डवाहकका २१ बर्ष नाघेका अविवाहित छोराछोरीका लागि ग्रिनकार्ड पाउने लाग्ने अवधि ८ बर्ष १ महिना पुगेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ जनवरी २०१७ भन्दा अगाडि प्राथमिकता मिति भएको आवेदनलाई अक्टोबरमा नेशनल भिसा सेन्टरले अगाडि बढाउनेछ । तर भिसाको अप्वाइन्टमेन्ट पाउन भने आवेदनको प्राथमिकता मिति २२ सेप्टेम्बर २०१५ भन्दा अगाडिको हुनुपर्छ ।
अमेरिकी नागरिकका विवाहित छोराछोरीका लागि पनि ग्रिनकार्ड पाउने लाग्ने अवधि निकै लामो छ । सेप्टेम्बरको भिसा बुलेटिन अनुशार यो अवधि १४ बर्ष १० महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ मार्च २०१० भन्दा अगाडि प्राथमिकता मिति भएको आवेदनलाई अक्टोबरमा नेशनल भिसा सेन्टरले अगाडि बढाउनेछ । तर भिसाको अप्वाइन्टमेन्ट पाउन भने आवेदनको प्राथमिकता मिति ८ जनवरी २००९ भन्दा अगाडिको हुनुपर्छ ।
अमेरिकी नागरिकका दाजुभाई दिदीबहिनीहरुका लागि ग्रिनकार्ड पाउन लाग्ने अवधि १६ बर्ष ६ महिना रहेको छ । यदि तपाईको आई १३० आवेदन युएससीआईएसबाट स्वीकृत भएर नेशनल भिसा सेन्टरमा पुगेको छ भने १ मार्च २००८ भन्दा अगाडि प्राथमिकता मिति भएको आवेदनलाई अक्टोबरमा नेशनल भिसा सेन्टरले अगाडि बढाउनेछ । तर भिसाको अप्वाइन्टमेन्ट पाउन भने आवेदनको प्राथमिकता मिति २२ अप्रिल २००७ भन्दा अगाडिको हुनुपर्छ ।
अमेरिकाभित्रै हुनेहरुका सन्दर्भमा भने १ सेप्टेम्बर २०१७ भन्दा अगाडि प्राथमिकता मिति हुने अमेरिकी नागरिकका अविवाहित छोराछोरीहरु, १ जनवरी २०१७ भन्दा अगाडि प्राथमिकता मिति हुने ग्रिनकार्डवाहकका २१ बर्ष नाघेका अविवाहित छोराछोरीहरु, १ मार्च २०१० भन्दा अगाडि प्राथमिकता मिति हुने अमेरिकी नागरिकका विवाहित छोराछोरी र १ मार्च २००८ भन्दा अगाडि प्राथमिकता हुने अमेरिकी नागरिकका दाजुभाई दिदीबहिनीहरुले अक्टोबरमा ग्रिनकार्ड आवेदन आई ४८५ फाइल गर्न सक्नेछन् ।
