आप्रवासी फारममा अपशब्द लेख्ने अमेरिकनलाई फिलिपिन्समा आजीवन प्रतिबन्ध
प्रकाशित मिति : मंसिर २, २०८० शनिबार
फिलिपिन्सले एक अमेरिकी यात्रीलाई फिलिपिन्स यात्रामा आजीवन प्रतिबन्ध लगाएको छ । उनीमाथि डिजिटल अध्यागमन फारममा अपशब्दहरू लेखेको र अध्यागमन अधिकारीहरूसँग असभ्य व्यवहार गरेको आरोप लगाइएको छ।
३४ बर्षका एन्थोनी लरेन्सलाई फिलिपिन्स प्रवेशमा रोक लगाउनुका साथै उनको कथित अनादरपूर्णू व्यवहारको कारण स्थायी रूपमा कालोसूचीमा राखिएको फिलिपिन्स ब्यूरो अफ इमिग्रेसन कमिश्नर नर्मन तान्सिङ्कोले बताएका छन् । लरेन्स नोभेम्बर ७ मा एयर एशियाको उडानमार्फत थाइल्याण्डको बैंककबाट फिलिपिन्सको राजधानी मनिलाको निनोय एक्विनो अन्तर्राष्ट्रिय विमानस्थलका लागि उडेका थिए।
फिलिपिन्सका अधिकारीहरूका अनुसार उनले आगमनमा एक अध्यागमन अधिकारीलाई घृणाजनक व्यवहार गरेका थिए । उनलाई अनलाइन यात्रा फारम भर्न सम्झाउदा उनले आफ्नो राहदानी र मोबाइल फोन अधिकारीमाथि फ्याँकेका थिए । लरेन्सले भने अध्यागमन अधिकारीको आरोप अस्वीकार गरेका छन् । उनले आफूले केही नफ्याँकेको र आवाज पनि चर्को नबनाएको दावी गरेका छन् ।
उनले फोनमा ट्राभल फारम सही ढंगले काम गर्न नसकेपछि अध्यागमन अधिकारीसँग सहयोग मागेको तर उनलाई सहयोग नगरी फर्काइएको बताएका छन् । उनले फारम भर्नका लागि तीनपटक असफल प्रयासहरू गरेको बताएका छन् । त्यसपछि आफ्नो कनेक्टिंग उडानका लागि छिटो अध्यागमन पूरा गर्न हतारमा गलत जानकारी प्रविष्ट गरेको उनले बताएका छन् ।
आफूले तुरुन्तै माफी मागेपनि अध्यागमन अधिकारीले चासो नदिएको र आफूले अध्यागमन अधिकारीसमक्ष हातले लेखेर समेत माफी पनि मागेको उनले बताएका छन् । फिलिपिन्स अधिकारीहरूले अनावश्यक प्रतिक्रिया देखाएका र आफूलाई उचित प्रक्रियाबाट वञ्चित गरेको लरेन्सको आरोप छ । उनलाई प्रतिबन्धको जानकारी दिने कुनै आधिकारिक कागजात पनि नदिइएको लरेन्सले बताए ।