आज नेपालमा हुनसक्ने प्रदर्शनलाई लिएर नेपालमा रहेका अमेरिकी नागरिकलाई दूतावासका ६ सुझाव
प्रकाशित मिति : मंसिर ६, २०८० बुधबार
आज नेपालमा हुनसक्ने प्रदर्शनलाई लिएर नेपालमा रहेका अमेरिकी नागरिकलाई अमेरिकी दूतावास काठमाडौंले विभिन्न ६ सुझाव दिएको छ । अमेरिकी दूतावास काठमाडौंले एक सुरक्षा अलर्ट जारी गर्दै नेपालमा रहेका अमेरिकी नागरिकहरुलाई सचेत गराएको हो । यस्तो अलर्ट काठमाडौंसहित नेपालभरका लागि जारी गरिएको छ ।
नेपाली संचारमाध्यमहरुले नोभेम्बर २३ मा काठमाडौंमा प्रदर्शन हुने र देशको बाँकी भागमा साना र्यालीहरू हुने अपेक्षा गरिएको समाचार प्रशारण गरिरहेको तथा विगतका प्रदर्शनहरूमा काठमाण्डौमा ट्राफिक अवरोध हुने गरेको र नेपाल प्रहरीले गैर घातक भीड नियन्त्रण उपायहरूको प्रयोग गरेको भन्दै दूतावासले अमेरिकी नागरिकलाई सचेत गराएको छ ।
प्रदर्शनहरू दक्षिणी काठमाडौंको बल्खु र तिनकुने क्षेत्रमा हुने अपेक्षा गरिएको भएपनि कुनै पनि प्रदर्शनको स्थानहरू परिवर्तन वा यी क्षेत्रहरू बाहिर जानसक्ने तथा प्रदर्शनहरू बिहान ११ बजे सुरु भई बेलुका ५ बजेसम्म चल्ने अपेक्षा गरिएतापनि यो समयभन्दा सुरु वा अन्त्य हुनसक्ने जनाइएको छ ।
अमेरिकी नागरिकलाई प्रदर्शन भएका क्षेत्रहरू तिर नजान, ठूला जमघटको वरपर अप्रत्याशित रूपमा सावधानी अपनाउन, आफ्नो वरपरको बारेमा सचेत रहन, लो प्रोफाइलमा रहन, आफ्नो व्यक्तिगत सुरक्षा योजनाहरूको पुनरावलोकन गर्न र अपडेटहरुका लागि स्थानीय मिडियाबाट जानकारी प्राप्त गर्न सचेत गराइएको छ । थप सहायताका लागि अमेरिकी दूतावास काठमाडौंको नियमित वा आपतकालिन नम्बरमा फोन गर्न वा इमेल गर्न सकिनेछ ।