के नेपाल डिभीका लागि अयोग्य हुने बाटोमा छ?
प्रकाशित मिति : जेष्ठ १०, २०८१ बिहीबार
नेपालीहरुले परिवारमा आधारित र रोजगारमा आधारित ग्रिनकार्ड पाउने संख्या अहिलेकै दरमा बृद्धि भएमा आगामी केहीबर्षमा नेपाल डिभी लोटरीका लागि अयोग्य हुने संकेत देखिएको छ । पछिल्ला केहीबर्षमा नेपालीहरुले परिवार र रोजगारमा आधारित ग्रिनकार्ड पाउदे दरमा उल्लेख्य बृद्धि भएको हो ।
अमेरिकी कानुन अनुशार परिवार र रोजगारमा आधारित ग्रिनकार्ड पाउने दर उच्च भएका देशहरु डिभीका लागि अयोग्य हुने प्रावधान रहेको छ । जस अनुशार पछिल्ला ५ बर्षमा रोजगार र परिवारमा आधारित ग्रिनकार्ड पाउनेहरुको संख्या ५० हजार पुगेमा त्यो देश डिभी लोटरीका लागि स्वत अयोग्य हुन्छ ।
अमेरिकी सरकारको डिपार्टमेन्ट अफ होमल्याण्ड सेक्युरिटीले बार्षिक रुपमा यो गणना गर्नेगर्छ । यो संख्यामा विगतमा डिभी लोटरीमार्फत आएका वा एसाइलम गरेकाहरुको भने गणना गरिदैन । हाल डिभी लोटरीमार्फत अमेरिका आएका र एसाइलम गरेकाहरुबाहेक पनि रोजगार र परिवारमा आधारित ग्रिनकार्ड पाउने नेपालीहरुको संख्या बार्षिक १० हजारको निकट पुग्न लागेको छ । कुनै पनि ५ बर्षको गणना गर्दा यो संख्या ५० हजार नाघेको खण्डमा त्यसपछिको बर्षका लागि नेपाल डिभी लोटरीका लागि अयोग्य हुनेछ ।
गत आर्थिक बर्ष २०२३ मा कुल ११६४० जना नेपालीहरुले अमेरिकाको ग्रिनकार्ड पाएको तथ्यांक डिपार्टमेन्ट अफ होमल्याण्ड सेक्युरिटीले सार्वजनिक गरेको छ । जसमध्ये अमेरिका आइसकेपछि ग्रिनकार्ड आवेदन दिएर ग्रिनकार्ड प्राप्त गर्नेहरु ४ हजार ८० र नेपालबाटै आप्रवासी भिसामा आउनेहरु ७ हजार ५ सय ६० रहेका छन् । यो संख्यामा ३३७५ डिभी लोटरी विजेताहरु र १ हजारको हाराहारीमा एसाइलमबाट ग्रिनकार्ड पाउनेहरु छन् । अर्थात् रोजगार र परिवारमा आधारित ग्रिनकार्ड पाउनेहरु ८ हजारको हाराहारीमा छन् ।
अघिल्लो आर्थिक बर्ष २०२२ को तथ्यांक हेर्दा १२ हजार १० जना नेपालीहरुले अमेरिकाको ग्रिनकार्ड पाएका छन् । तीमध्ये २८९४ जना डिभी लोटरीमार्फत र १२६२ जनाले एसाइलममार्फत ग्रिनकार्ड प्राप्त गरेका थिए । झण्डै ८ हजार नेपालीहरुले परिवार र रोजगारमा आधारित ग्रिनकार्ड पाउन सफल भएका थिए । परिवार र रोजगारमा आधारित ग्रिनकार्ड पाउनेहरु बार्षिक २ हजारको दरले थपिएको खण्डमा केही बर्षमा नै नेपालीहरु डिभी लोटरीका लागि अयोग्य हुनेछन् ।
सन् २०१३ यताको तथ्यांक हेर्दा कुनै पनि ५ बर्षको अवधिमा ५० हजारको हाराहारी वा सोभन्दा बढी नेपालीहरुले अमेरिकाको ग्रिनकार्ड पाएका छन् । तर यो संख्यामा डिभी लोटरी र एसाइलमबाट ग्रिनकार्ड पाउनेहरुको संख्या पनि समावेश भएकाले नेपाली डिभी कार्यक्रमका लागि योग्य भइरहेको हो ।
तथ्यांक हेर्दा सन् २०१३ मा १३ हजार ४६, सन् २०१४ मा १२ हजार ३ सय ५७, सन् २०१५ मा १२ हजार ९ सय २६, सन् २०१६ मा १२ हजार ८५१, सन् २०१७ मा ११ हजार ६ सय १०, सन् २०१८ मा ११ हजार ९ सय ५३, सन् २०१९ मा १० हजार २ सय १ जना नेपालीले अमेरिकाको ग्रिनकार्ड पाएका थिए । कोरोना महामारीका बाबजुत २०२० मा ७ हजार ८ सय ४७ र २०२१ मा ७ हजार ३ सय ९ नेपालीले अमेरिकाको ग्रिनकार्ड पाएका थिए ।
यसर्थ अमेरिकी दूतावासले आप्रवासी भिसा अन्तरवार्ताको दर बृद्धि गदै भिसा जारी गर्ने संख्या बढाएमा वा युएससीआईएसले रोजगार र परिवारमा आधारित नेपालीहरुको ग्रिनकार्ड स्वीकृत गर्ने दर अलिकतिमात्र बढाएको खण्डमा पनि नेपालीहरु आगामी केही बर्षमा डिभीका लागि अयोग्य हुनेछन् । आई १३० वा आई १४० आवेदन स्वीकृत भएर परिवार र रोजगारमा आधारित ग्रिनकार्डका लागि पर्खिरहेका नेपालीहरुको संख्या पनि निकै ठूलो भइसकेको छ ।