एकबर्षमा ७९३० नेपालीले लिए अमेरिकाको नागरिकता
प्रकाशित मिति : जेष्ठ ११, २०८१ शुक्रबार
![](https://i0.wp.com/www.khasokhas.com/wp-content/uploads/2023/08/Nepali-American.jpg?fit=1500%2C874&ssl=1)
अमेरिकी सरकारको डिपार्टमेन्ट अफ होमल्याण्ड सेक्युरिटीले गत आर्थिक बर्ष २०२३ मा अमेरिकी नागरिकता लिने नेपालीहरुको संख्या सार्वजनिक गरेको छ । २०२३ मा कुल ७ हजार ९ सय ३० जना नेपालीहरुले अमेरिकी नागरिकता लिएका छन् । जसमध्ये पहिलो क्वार्टरमा १९२०, दोश्रो क्वार्टरमा १८४०, तेश्रो क्वार्टरमा १८३० र चौथो क्वार्टरमा २३३० जना नेपालीहरुले अमेरिकाको नागरिकता लिएका छन् । अमेरिकी नागरिकता प्राप्त गर्न सामान्यतया अमेरिकी ग्रिनकार्ड प्राप्त गरेको ५ बर्ष पूरा भएको हुनुपर्छ । त्यो बाहेक योग्यताका अन्य मापदण्डहरु पनि छन् ।
आर्थिक बर्ष २०२२ मा ९ हजार ४ सय ८ जना नेपालीहरुले अमेरिकाको नागरिकता प्राप्त गरेका थिए । सन् २०२१ मा ७ हजार २ सय ३२ जना नेपालीहरुले अमेरिकन नागरिकता प्राप्त गरेका थिए भने कोरोना महामारीका बाबजुत आर्थिक बर्ष सन् २०२० मा अमेरिकाभर ५ हजार ७ सय ९४ नेपालीहरुले अमेरिकन नागरिकता प्राप्त गरेका थिए ।
आर्थिक बर्ष सन् २०१९ मा अमेरिकी नागरिकता लिने नेपालीहरुको संख्या ७ हजार ४ सय ९ रहेको थियो । जसमा ३ हजार ५ सय ७७ जना महिला र ३ हजार ८ सय ३२ जना पुरुष रहेका थिए । उनीहरुमध्ये ८१० जना न्युयोर्क निवासी, १२०४ जना टेक्सास निवासी र ६०१ जना क्यालिफोर्निया निवासी रहेका थिए ।
सन् २०१८ मा अमेरिकाभर ५३५२ जना नेपालीहरुले अमेरिकाको नागरिकता लिए । त्यतीबेला सबैभन्दा धेरै न्युयोर्क निवासी ७१८ जना नेपालीहरुले अमेरिकन नागरिकता लिए भने दोश्रोमा टेक्सास निवासी ५७० र तेश्रोमा क्यालिफोर्निया निवासी ५३४ जना रहेका थिए ।
त्यस्तै सन् २०१७ मा भने अमेरिकी नागरिकता लिने नेपालीहरुको संख्या ४५ सय ९ रहेको थियो । त्यतीबेला न्युयोर्क निवासी ५६० र क्यालिफोर्निया निवासी ५२० जना रहेका थिए । सन् २०१६ मा ५ हजार ४ जना नेपालीहरुले अमेरिकाको नागरिकता लिए । जसमध्ये न्युयोर्क निवासी ६२९ जना रहेका थिए भने उक्त बर्ष सबैभन्दा धेरै टेक्सास निवासी ६५५ जना नेपालीहरुले अमेरिकन नागरिकता लिए ।
विगत ७ बर्षमा नेपाली अमेरिकनको संख्या तेब्बरले बृद्धि भएको छ । किनभने २०१५ सम्म २५ हजार नेपालीले अमेरिकी नागरिकता लिएका थिए भने त्यो यतामात्र सन् २०२३ सम्म ५२ हजार ६ सय ४९ जना नेपालीहरुले अमेरिकी नागरिकता लिइसकेका छन् । आर्थिक बर्ष २०२४ को ८ महिनाको तथ्यांक जोड्ने हो भने यो संख्या ८० हजार नाघिसकेको छ ।
अमेरिकी सरकारको आप्रवास तथ्यांक कार्यालयका अनुसार सन् १९९० सम्ममा अमेरिकी नागरिकता पाउन सफल नेपालीहरुको संख्या जम्मा २६१६ मात्र रहेको थियो । त्यतीबेला सन् १९९० कै वर्षमा जम्मा ३७ जना नेपालीले अमेरिकन नागरिकता लिएका थिए ।
त्यो भन्दा अगाडि सन् १९८९ मा ३५ जना नेपालीले अमेरिकन नागरिकता लिएका थिए । त्यसैगरी सन् १९८८ मा जम्मा ३१ जनाले र सन् १९८७ मा २२ जनाले अमेरिकन नागरिकता लिएका थिए ।
सन् १९९१ मा अमेरिकन पाउने नेपालीको संख्या थोरै बढेर ५६ पुगेको थियो । सन् १९९२ मा ४४ जना नेपालीहरुले अमेरिकन नागरिकता पाए । सन् १९९३ मा ४६ जनाले , सन् १९९४ मा ७० जनाले, सन् १९९५ मा ६० जनाले , सन् १९९६ मा ११९ जनाले, सन् १९९७ मा ७८ जनाले र सन् १९९८ मा ८२ जना नेपालीले अमेरिकन नागरिकता पाए ।
सन् १९९९ मा १४३ जनाले, सन् २००१ मा २०५ जनाले, सन् २००२ मा २४७ जनाले,सन् २००३ मा ३१८ जनाले , सन् २००४ मा ४०८ जनाले अमेरिकन नागरिकता पाए । त्यस्तै सन् २००५ मा ४१७ जनाले, २००६ मा ५७५ जनाले, सन् २००७ मा ६३८ जनाले, सन् २००८ मा ९५३ जनाले, सन् २००९ मा १६३२ जनाले, सन् २०१० मा २१८५ जनाले र सन् २०११ मा २२३५ जनाले अमेरिकन नागरिकता लिएका थिए ।
त्यस्तै सन् २०१२ मा २४४८ जना नेपालीहरुले अमेरिकन नागरिकता लिएका थिए । सन् २०१३ मा अमेरिकन नागरिकता लिने नेपालीहरुको संख्या २७११ रहेको थियो । सन् २०१४ मा २८८८ नेपालीले अमेरिकी नागरिकता लिए भने सन् २०१५ मा ४२२५ जना नेपालीले अमेरिकन नागरिकता लिए ।