अमेरिकाको आप्रवासी भिसाका लागि पहिलो प्राथमिकता डिभी, दोश्रोमा अमेरिकनका नेपाली बाबुआमा


प्रकाशित मिति : असार १७, २०८१ सोमबार

नेपालीहरुका सन्दर्भमा आप्रवासी भिसाहरुमा सबैभन्दा पहिलो प्राथमिकता डाइभर्सिटी भिसालाई दिएको अमेरिकाले दोश्रो प्राथमिकता भने अमेरिकी नागरिकका नेपाली बुबाआमालाई दिएको छ । चालु आर्थिक बर्षको ९ महिनामा नेपालीहरुका सन्दर्भमा डाइभर्सिटी भिसापछि सबैभन्दा धेरै भिसा पाउनेहरुमा अमेरिकी नागरिकका नेपाली बुबाआमाहरु रहेका छन् ।

चालु आर्थिक बर्ष २०२४ को ९ महिनामा आप्रवासी भिसा प्राप्त गर्ने अमेरिकी नागरिकका बुबाआमाको संख्या २ हजार नाघेको छ । अक्टोबरदेखि मेसम्ममात्र १७८६ जना अमेरिकी नागरिकका बुबाआमाहरुले आप्रवासी भिसा प्राप्त गरेका छन् । यो श्रेणीमा आप्रवासी भिसा प्राप्त गर्न भिसा करेन्ट हुनु पर्दैन ।

अक्टोबरमा ३३१, नोभेम्बरमा १६६, डिसेम्बरमा २६३, जनवरीमा पनि २६३, फेब्रुअरीमा ११०, मार्चमा २६०, अप्रिलमा २८३ र मेमा ३७३ जना अमेरिकी नागरिकका नेपाली बुबाआमाहरुले आप्रवासी भिसा प्राप्त गरेको अमेरिकी विदेश मन्त्रालय ब्यूरो अफ कन्सुलर अफेयर्सको तथ्यांक रहेको छ । यो संख्यामा अमेरिकाभित्रै स्टाटस एड्जष्ट गर्नेहरुको संख्या भने समावेश छैन ।

आईआर फाइभ श्रेणीको यो भिसालाई परिवारमा आधारित ग्रीन कार्ड पनि भनिन्छ । यो भिसाले कम्तीमा २१ वर्षको उमेरका अमेरिकी नागरिकहरूका विदेशी बाबुआमालाई अमेरिकामा बस्न र स्थायी बासिन्दा बन्न अनुमति दिन्छ।

त्यसपछि अमेरिकी नागरिक र ग्रिनकार्डवाहकका नेपाली दम्पत्तिले आप्रवासी भिसा पाउने गरेका छन् । यसलाई दुई श्रेणीमा विभाजन गरेर भिसा जारी गरिन्छ । अमेरिकी नागरिक वा ग्रिनकार्डवाहकका दम्पत्तिले पाउने आप्रवासी भिसा आईआर वान र सीआर वान श्रेणीको हुन्छ ।

१० बर्षे ग्रिनकार्ड प्राप्त गर्नेगरी आउनेले आईआरवान भिसा पाउँछन् भने २ बर्षे शर्त सहितको ग्रिनकार्ड पाउनेले सीआरवान भिसा पाउँछन् । सामान्यतया विवाह गरेको २ बर्ष पूरा भएको छैन भने २ बर्षे ग्रिनकार्ड पाउनेगरी उनीहरुले सीआर वान भिसा प्राप्त गर्छन् तर विवाह गरेको २ बर्ष नाघिसकेको छ भने आईआर वान भिसा प्रदान गरिन्छ ।

अक्टोबरदेखि मेसम्म सीआरवान भिसा ८७३ जना नेपालीहरुले पाएका छन् भने सोही अवधिमा ५५६ जना नेपालीहरुले आईआरवान भिसा पाएका छन् । अर्थात् अक्टोबरदेखि मेसम्म जम्मा १४२९ जना अमेरिकी नागरिक र ग्रिनकार्डवाहकका नेपाली दम्पत्तिले गैरआप्रवासी भिसा प्राप्त गर्न सफल भएका छन् । यसमा पनि अमेरिकामा नै रहेर स्टाटस एड्जष्ट गर्नेको संख्या समावेश छैन ।

२४ सय नेपालीले पाइसके डाइभर्सिटी भिसा

मे महिनामा २९३ जना नेपालीहरुले डाइभर्सिटी भिसा प्राप्त गरेको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । योसँगै चालु आर्थिक बर्ष २०२४ मा डाइभर्सिटी भिसा पाउने नेपालीहरुको संख्या २४ सय नाघेको छ । अक्टोबरदेखि मेसम्म २१४७ जना नेपालीहरुले डाइभर्सिटी भिसा प्राप्त गरेकोमा जुनको समेत अनुमानित संख्या जोड्दा २४ सय नाघेको हो ।

मार्चमा डाइभर्सिटी भिसा पाउने नेपालीहरुको संख्या अनपेक्षित रुपमा घटेपनि अप्रिलमा यो संख्यामा उल्लेख्य प्रगति भएको थियो ।  अप्रिलमा कुल ३९९ जना नेपालीहरुले डाइभर्सिटी भिसा प्राप्त गरेका थिए ।

डिसेम्बरदेखि डाइभर्सिटी भिसा पाउने नेपालीहरुको संख्या घट्दो क्रममा थियो । डिसेम्बरमा ४१४ जना नेपालीहरुले डाइभर्सिटी भिसा पाएकोमा जनवरीमा त्योभन्दा ३११ जना र फेब्रुअरीमा त्योभन्दा पनि कम २६८ जना नेपालीहरुले अमेरिकाको डाइभर्सिटी भिसा पाएका थिए ।

मार्चमा यो संख्या अझ घटेर १९८ मा झरेको थियो । चालु आर्थिक बर्षको पहिलो महिना अक्टोबरमा जम्मा ३ जना र दोश्रो महिना नोभेम्बरमा जम्मा २६१ जना नेपालीहरुले डाइभर्सिटी भिसा पाएका थिए ।

आप्रवासी भिसाहरुमा अमेरिकी दूतावास काठमाडौंले सबैभन्दा पहिलो प्राथमिकता डाइभर्सिटी भिसालाई नै दिएको देखिन्छ । अर्थात् आप्रवासी भिसामा अन्य सबै श्रेणीको तुलनामा सबैभन्दा धेरै भिसा डिभी विजेताहरुलाई प्रदान गरिएको छ ।

सन् २०२२ मा डिभी भरेकाहरुले अहिले भिसा पाइरहेका हुन् । २०२३ मा भरेकाहरुले आगामी अक्टोबरदेखि भिसा पाउन सुरु गर्नेछन् ।

आर्थिक बर्ष २०२४ का डिभी विजेता नेपालीहरुको संख्या ३८६३ रहेको छ । २०२४ को डिभी लोटरी कार्यक्रम अन्तरगत नेपाल धेरै डिभी लोटरी पार्नेमा एसियामा तेश्रो भएको छ । २०२४ को डिभी लोटरीका लागि एसियामा सबैभन्दा धेरै इरानका ५ हजार ७७ जनाले र दोश्रोमा अफगानिस्तानका ४५३६ जनाले डिभी पारेका थिए ।

कुल १ लाख ४३ हजार जनाले डिभी लोटरी पारेकोमा अधिकतम ५५ हजारसम्मले मात्र भिसा पाउनसक्नेछन् । अर्थात् डिभी पर्दैमा सबैजना अमेरिका आउन पाउने ग्यारेन्टी हुँदैन ।

डिभी २०२४ का लागि विश्वभरबाट २ करोड २१ लाख ८५ हजार ६ सय १९ योग्यले डिभीका लागि आवेदन दिएका थिए । डिभी २०२३ को तुलनामा २०२४ मा धेरै व्यक्ति सहभागी भएका थिए । डिभी २०२३ मा ९५ लाख ७० हजार २ सय ९१ जना सहभागी भएका थिए भने २०२४ का लागि दोब्बरभन्दा धेरै सहभागी भए ।

© 2024 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com