२२ हजार ३ सय ९० नेपालीले दिए अमेरिकी कामदार भिसाको आवेदन
प्रकाशित मिति : पुस १, २०७४ शनिबार
अमेरिकाको कामदार भिसा एचवान बीका लागि आवेदन दिनेमा नेपालीहरु टप ट्वान्टीमा परेको रिपोर्ट युएससीआईएसले सार्वजनिक गरेको छ । रिपोर्ट अनुशार अमेरिकाको कामदार भिसाका लागि आवेदन दिनेमा १२ औं नम्बरमा नेपालीहरु रहेका छन् ।
विश्वभरबाट यो भिसाका लागि आवेदन दिनेमा भारतीयहरु सबैभन्दा अगाडि रहेका छन् भने नेपालीहरु पनि अग्रपंक्तिमा नै देखिएका छन् । सन् २००७ देखि सन् २०१७ सम्मको तथ्यांक हेर्दा १० बर्षमा कुल २२ हजार ३ सय ९० नेपालीहरुले एचवान बी भिसाका लागि आवेदन दिएका छन् ।
सन् २००७ मा २७७५, सन् २००८ मा २५३८, सन् २००९ मा २७२४, सन् २०१० मा २४६७, सन् २०११ मा २१६९, सन् २०१२ मा २०६६, सन् २०१३ मा १७८८, सन् २०१४ मा १५९८, सन् २०१५ मा १५१२, सन् २०१६ मा १५०४ र सन् २०१७ को जुनसम्ममा १२४९ नेपालीहरुका तर्फबाट एचवान बी भिसा आवेदन परेको थियो ।
सन् २०१७ मा परेका कुल ३ लाख ३६ हजार १ सय ७ आवेदनहरुमध्ये युएससीआईएसले १ लाख ९७ हजार १ सय २९ आवेदन स्वीकृत गरेको थियो । आवेदन दिनेमा जापान, टर्की , जर्मनी लगायतका मुलुकका तुलनामा नेपालीहरु अगाडि छन् भने विश्वभा भारत पहिले, चीन दोश्रो, फिलिपिन्स तेश्रो र साउथ कोरिया चौथो नम्बरमा रहेको छ ।
अमेरिकाको अध्यागमन र राष्ट्रियता ऐनले अमेरिकामा रहेका रोजगारदाताले विदेशी कामदार राख्न पाउनेगरी एचवान बी भिसाको व्यवस्था गरेको छ ।