प्रचण्डले टिका नलगाउने, बाबुरामले बुबासँग लगाउने
प्रकाशित मिति : आश्विन २४, २०७३ सोमबार
यसपालीको दशैंको टिका प्रधानमन्त्री पुष्पकमल दाहाल प्रचण्डले टिका नलगाएरै मनाउने भएका छन् । प्रचण्डले दशैंको दिन परिवारसँगै बसेर बिताउने भएपनि टिका र जमरा भने नलगाउने जनाईएको छ ।
दशैंमा टिका नलगाउने कार्यक्रम भएकाले प्रचण्डले राष्ट्रपति विद्या भण्डारीबाट पनि टिका ग्रहण गर्ने छैनन् । राष्ट्रपतिले प्रधानमन्त्रीलाई टिका लगाइदिने चलन भएपनि प्रचण्डले भण्डारीबाट टिका नलगाउने जनाइएको छ । राष्ट्रपति भण्डारीले राजनीतिक दलका नेता, सांसद, संवैधानिक निकायका प्रमुख, कर्मचारी र सर्वसाधारणलाई भने टिका लगाइदिने कार्यक्रम छ ।
त्यस्तै प्रचण्ड माओवादीबाट अलग्गिएर नयाँ शक्ति पार्टी नेपालका संयोजक बनेका पूर्व प्रधानमन्त्री डाक्टर बाबुराम भट्टराईले भने आफ्ना पिताबाट दशैंको टिका ग्रहण गर्ने कार्यक्रम रहेको जनाइएको छ । भट्टराईले कोटेश्वरमा पिताको हातबाट टिका लगाएर दशैं मनाउने कार्यक्रम रहेको छ ।
