प्रेमराजाको नेपाल हाउस नामजस्तै, नेपाली कला, संस्कृति र पर्यटन पर्वद्धन
प्रकाशित मिति : श्रावण ४, २०७६ शनिबार
अमेरिकाको मेरिल्याण्ड राज्यको बाल्टिमोरमा रहेको छ बरिष्ठ गायक प्रेमराजा महतको रेष्टुरेण्ट । नेपाल सरकारका अवैतनिक महाबाणिज्यदूत महतको नेपाल हाउस नामको रेष्टुरेण्ट साँच्चीकै नामजस्तै रहेको । यो रेष्टुरेण्टभित्र छिरेपछि नेपाल छिरेको अनुभव हुन्छ ।
रेष्टुरेण्टभित्र छिर्न बित्तिकै नमस्ते गर्दै स्वागतमा तयार एउटा युवतीको प्रतिकृति देख्न सकिन्छ । त्यसपछि एउटा संग्राहालयमा नै छिरेको अनुभव हुन्छ ।
रेष्टुरेण्टको भित्तामा ढल्नु अगाडिको धरहरादेखि बर्षौ पुरानो बौद्धनाथ स्तुपासम्मका तस्वीहरु सजाइएका छन् । नेपालको ग्रामिण परिवेश झल्किनेदेखि अन्य विभिन्न कलाकृतिले सजिएको छ रेष्टुरेण्ट । कैयन पुराना एन्टिक सामाग्रीहरुदेखि नेपाली मौलिक कलाका सामाग्रीहरुले रेष्टुरेण्टमा रौनक थपेको छ ।
नेपालका बारेमा सकारात्मक सन्देश जाने यस्ता कलाकृति शब्दविना नै आफै बोलिरहेका हुन्छन् नेपालको पर्यटन प्रवद्र्धनमा । त्यो बाहेक कलाकार महतले आउने ग्राहकहरुलाई नेपालको पर्यटकीय महत्वबारे व्याख्या गर्दै नेपाल भ्रमणका लागि प्रोत्साहित समेत गर्छन् ।
रेष्टुरेण्टको अलिक भित्रपट्टी सारंगी, मादल, बासुरी लगायतका नेपाली वाद्यवाधनका सामाग्रीहरु सजाइएको छ । जहाँ महत आफैले बेलाबेलामा सारंगीको सुमधुर संगीत सुनाउँछन् । र रेष्टुरेण्टमा आउनेहरुलाई नेपाली खानामात्र होइन, नेपाली संगीतको समेत स्वाद चखाउँछन् ।
प्रेमराजा महतको नपाल हाउसमा पुग्नेले एकैपटक आँखा, कान र जिब्रोको लागि परिकार प्राप्त गर्दछन् । जसले नेपालको कला, संस्कृति र पर्यटन प्रवद्र्धनमा समेत महत्वपूर्ण भूमिका खेलेको देखिन्छ ।
विदेशमा नेपालको प्रवद्र्धनका लागि यस्ता सृजनशिल प्रयासले ठूलो महत्व राख्छ ।
पत्नी कविता महतका साथमा नेपाल हाउसमा प्रेमराजा । फोटो : बाल्टिमोर म्यागाजिन