सिमाक्षेत्रमा पर्खाल निर्माणका लागि राष्ट्रिय संकटकालको घोषणा गर्ने ट्रम्पको चेतावनी
प्रकाशित मिति : पुस २१, २०७५ शनिबार
अमेरिकी राष्ट्रपति डोनाल्ड ट्रम्पले मुलुकमा राष्ट्रिय संकटकालको घोषणा गर्ने चेतावनी दिएका छन् । संसदको सहमतिविना नै अमेरिका र मेक्सिकोको सिमाक्षेत्रमा पर्खाल निर्माणका लागि मुलुकभर राष्ट्रिय संकटकाल घोषणा गर्ने ट्रम्पले चेतावनी दिएका हुन् ।
बरिष्ठ डेमोक्र्याट नेताहरुसँगको भेटपछि ट्रम्पले यस्तो प्रतिकृया दिएका हुन् । भेटमा डेमोक्रेटिक पार्टीका नेताहरुले पर्खाल लगाउने ट्रम्पको प्रस्तावमा असहमति जनाएका थिए ।
सिमानामा पर्खाल लगाउने विषयमा सहमति जुट्न नसक्दा गत डिसेम्बर २२ देखि अमेरिकी सरकार आंशिक रुपमा शटडाउन भइरहेको छ । जसका कारण झण्डै ८ लाख संघीय कर्मचारीहरु वेतलवी भएका छन् ।
शुक्रबार झण्डै ९० मिनेट डेमोक्रेटिक नेताहरुसँग ट्रम्पको भेटघाट भएको थियो, जसलाई ट्रम्पले उत्पादनमुलक भएको बताएका थिए । तर उनले पर्खाल लगाउने बजेट संसदबाट पारित नभए संकटकाल लगाएर भएपनि पर्खाल लगाउने बाटो आफूसँग भएको चेतावनी दिए ।
अमेरिकामा युद्धको समयमा वा राष्ट्रिय संकटकाल घोषणा गरिएको समयमा राष्ट्रपतिले निर्माणको काम गर्नसक्ने प्रावधान रहेको छ । तर त्यसका लागि रकम भने अमेरिकी संसदले फरक उद्देश्यका लागि रक्षा मन्त्रालयका लागि छुट्याएको बजेटबाट खर्च गर्नुपर्छ ।