मंगलबार विशेष सम्बोधन गर्दै ट्रम्प, घोषणा गर्लान् त संकटकाल ?
प्रकाशित मिति : पुस २४, २०७५ मंगलबार
अमेरिकी राष्ट्रपति डोनाल्ड ट्रम्पले अमेरिकाको न्युयोर्क समय अनुशार मंगलबार राती ९ बजे राष्ट्रका नाममा विशेष सम्बोधन गर्ने भएका छन् । राष्ट्रपति ट्रम्पले मेक्सिकोसँगको सिमानामा पर्खाल निर्माणका लागि अमेरिकामा संकटकालको घोषणा गर्नसक्ने चर्चा भइरहदा यो सम्बोधनलाई अर्थपूर्ण रुपमा हेरिएको छ ।
ट्रम्पले सिमा सुरक्षाका विषयमा नै सम्बोधन गर्ने जनाइएको छ । ट्रम्पको सम्बोधनको एनबीसी, एबीसी, सीबीएस, फक्स, सीएनएन, एमएसएनबीसी लगायतका अमेरिकी राष्ट्रिय च्यानलहरुले ट्रम्पको सम्बोधनको प्रत्यक्ष प्रशारण गर्ने भएका छन् ।
अमेरिकी राष्ट्रपतिहरुले दशकौंदेखि यस्ता घोषणाहरुका लागि ह्वाइटहाउसको ओभल अफिस प्रयोग गर्दै आएका छन् । ट्रम्पले ट्वीटरमार्फत आफूले राष्ट्रिय सम्बोधन गर्न लागेको घोषणा गरेका हुन् । सिमाक्षेत्रमा व्यप्त संकटको उल्लेख गर्दै ट्रम्पले पूर्वीय समय अनुशार राती ९ बजे सम्बोधन गर्न लागेको जनाएका हुन् ।
कैयन ट्रम्पविरोधीहरुले संचारमाध्यमहरुलाई ट्रम्पको सम्बोधनको प्रत्यक्ष प्रशारण नगर्न आग्रह समेत गरिरहेका छन् । राती ९ बजेका शोहरु स्थगित गरेर प्रत्यक्ष प्रशारण गर्नुपर्ने भएकाले सुरुमा टेलिभिजन च्यानलहरु पनि अन्यौलग्रस्त भएका थिए । तर पछि उनीहरुले प्रत्यक्षप्रशारण गर्न सहमति जनाएका छन् ।
सन् २०१४ मा तत्कालिन अमेरिकी राष्ट्रपति बराक ओबामाको अध्यागमनबारेको सम्बोधन कैयन टेलिभिजनहरुले प्रत्यक्ष प्रशारण गर्न अस्वीकार गरेका थिए । एबीसी, एनबीसी, सीबीएस लगायतका टेलिभिजनहरुले ओबामाको सम्बोधन प्रशारण गरेनन् ।
ट्रम्पको सम्बोधन पनि प्रत्यक्ष रुपमा टेलिभिजनबाट प्रशारण गर्नेमा विवाद रहदै आएको छ । कतिपयले ट्रम्पले सम्बोधनका क्रममा कैयन गलत सुचनाहरु दिने भएकाले उनको सम्बोधन प्रत्यक्ष प्रशारण गर्न नहुने धारणा व्यक्त गर्दै आएका छन् ।