शियाटलबाट लस एन्जलस जाने ट्रेन ३६ घण्टादेखि ओरेगनमा फस्यो, के गर्दैछन् १८३ यात्रु ?
प्रकाशित मिति : फाल्गुन १४, २०७५ मंगलबार
हिमपातका कारण अमेरिकाको ओरेगनमा ३० घण्टादेखि १८३ जना यात्रुहरु बोकेको एमट्रयाक ट्रेन फसेको जनाइएको छ । आइतबार बेलुका ट्रेन अचानक बीचबाटोमा नै रोकिएर फसेको थियो ।
एउटै स्थानमा ३६ घण्टासम्म फसेपछि मंगलबार विहान ट्रेन चल्न सुरु गरेको थियो । तर आधा माइल चलेपछि ट्रेन पुन रोकिएको छ । आइतबार ट्रयाकमा ढलेको रुखमा ठोक्किएपछि ट्रेन बन्द भएको थियो । तर घटनाबाट कसैलाई क्षति भने पुगेको छैन ।
ट्रेनमा तापक्रम, विजुली र खाना उपलब्ध गराइएकाले ट्रेनभित्रको वातावरण पार्टीमा बदलिएको थियो । एकआपसमा नचिनेकाहरु तास खेलेर बसेका थिए, कहिले भेट नभएकाहरु खालीभागमा नाचेका थिए, टिनएजरहरुले बच्चाबच्चीलाई सुताउनका लागि ससना गितारहरु बजाएका थिए ।
ट्रेन हिउँले घेरिएकाले यात्रुहरु ट्रेनबाहिर निस्कन सक्ने अवस्था भने नरहेको जनाइएको छ । कतिपय लस एन्जलस जाने विद्यार्थीहरु भने उनीहरुका प्रोफेसरले ट्रेनका कारण कक्षा छुटेको भनाई स्वीकार नगर्ने भन्दै आत्तिएको जनाइएकोछ । वैकल्पिक बाटोबाट वा अर्को ट्रेनबाट यात्रुहरुलाई ल्याउने अवस्था नरहेको एमट्याक प्रवक्ताले बताएका छन् ।
ट्रेनमा विजुली र प्रयाप्त खाना समेत भएकाले र त्यसको मूल्य यात्रुहरुलाई नतिराइने जनाइएको छ । तर मंगलबार विहान यात्रुहरुलाई उपलब्ध गराइएको ब्रेकफास्ट उपलब्ध अन्तिम खाना रहेको जानकारी गराइएको थियो । त्यसक्षेत्रमा सोमबारसम्म १० इन्चसम्म हिमपात भएको छ ।
ट्रेनमा २० जना जापानी मुलका विद्यार्थीहरु समेत रहेको जनाइएको छ । खाना उपलब्ध भएपनि ट्रेनमा बच्चाबच्चीका लागि डाइपर नभएका कारण बाबुआमाहरुलाई समस्या परेको छ । फोनहरु भने राम्रोसँग नचलेको जनाइएको छ । शियाटलबाट हरेक दिन लस एन्जलस जाने ट्रेन ११ ओरेगनमा फसेको हो ।
