अमेरिकाको विसकन्सिनमा पर्यो ७ सय ६८ मिलियनको पावरबल लोटरी
प्रकाशित मिति : चैत्र १४, २०७५ बिहीबार
अमेरिकाको इतिहासमा नै तेश्रो ठूलो ज्याकपट लोटरी विसकन्सिनका व्यक्तिले प्राप्त गरेका छन् । झण्डै ७ सय ६८ मिलियन डलरको पावर बल लोटरी एउटै व्यक्तिलाई परेको जनाइएको छ ।
अमेरिकाको इतिहासमा सन् २०१६ को जनवरी १३ मा झण्डै १ दशमलव ५८ बिलियनको लोटरी खुलाइएको थियो । उक्त लोटरीका विजेता तीनजना रहेका थिए ।
सन् २०१८ को अक्टोबर २३ मा पनि १ दशमलव ५४ बिलियनको लोटरी खुलाइएको थियो । जसका विजेता साउथ क्यारोलिनाका एकजनामात्र थिए ।
७५० मिलियन डलरको बुधबारको ज्याकपट धेरै टिकट बिक्रीका कारण ७ सय ६८ मिलियन डलरभन्दा माथि पुगेको थियो । बिक्रि भएका २ सय ९२ मिलियन टिकटमध्ये जित्ने मौका एउटामात्र रहेको थियो ।
विसकन्सिनमा लोटरी विजेता अज्ञात बस्न नपाउने नियम रहेको छ । त्यस्तै उनले जितेको रकममध्ये ठूलो हिस्सा करको रुपमा समेत बुझाउनुपर्नेछ । बुधबारको जित्ने नम्बरहरुमा १६, २०, ३७, ४४, ६२ र पावरबल १२ रहेका छन् ।