क्यालिफोर्नियामा ग्लोबल नेपाली पेशागत सम्मेलन, पहिलोपटक ‘नेतृत्वमा महिला’ विषयक छलफल
प्रकाशित मिति : भाद्र २९, २०७६ आईतबार
आगामी सेप्टेम्बर २१ मा अमेरिकाको क्यालिफोर्नियामा ग्लोबल नेपाली पेशागत सम्मेलन हुने भएको छ । यो सम्मेलन विश्वभरका पेशाकर्मीहरुबीच सम्बन्ध कायम राख्न कोशेढुंगा सावित हुने अपेक्षा आयोजकको छ ।
सेलिब्रेटी बास्तुकार जोन पिकार्ड प्रमुख वक्ता रहेको उक्त सम्मेलनमा नेपालको पछिल्लो हरित प्रविधि नीतिबारे सम्बोधन गरिने जनाइएको छ । कार्यक्रममा इमिग्रेशन, प्रविधि, बित्त लगायतका विषयमा बोल्ने अन्य अन्तर्राष्ट्रिय वक्ताहरु समेत रहेका छन् ।
सम्मेलनमा पहिलोपटक नेतृत्वमा महिला विषयक छलफल कार्यक्रम समेत गरिने भएको छ । उक्त छलफलमा पेशागत महिलाहरुले समुदायमा भोग्नुपरेका अवरोधबारे सम्बोधन गरिने आयोजकले जानकारी दिएका छन् ।
ग्लोबल नेपाली पेशागत सम्मेलन जीएनपीएन सन् २००७ मा दर्ता भएको गैरनाफामुलक संस्था हो । हरेक बर्ष सम्मेलन गर्दै आएको यो संस्थाको यसपटकको सम्मेलनको चेयर रुपेश सिंखडाले गर्दैछन् ।
