१० वटा आगोको चपेटामा क्यालिफोर्निया, के हो इजी, गेटी र किन्केड फायर ?
प्रकाशित मिति : कार्तिक १३, २०७६ बुधबार
क्यालिफोर्निया अहिले १० वटा आगोको चपेटामा परिरहेको छ । तीमध्ये तीनवटा आगो इजी फायर, गेटी फायर र किन्केड फायरले क्यालिफोर्नियालाई आक्रान्त पारेको छ । आगोका कारण झण्डै साढे २ करोड व्यक्तिलाई कुनै कुनै प्रकारको जोखिममा रहेको भन्दै रेड फ्ल्याग चेतावनी दिइएको छ ।
बुधबार विहानबाट क्यालिफोर्नियाको भिन्तुराबाट सुरु भएको इजी फायर आगो तीब्र गतिमा फैलिदा रोनाल्ड रेगन प्रेसिडेण्टल लाइब्रेरी र संग्राहालय जोखिममा परेका छन् । प्रहरी र अग्नी नियन्त्रकहरु लाइबे्ररीको आसपासमा आगो पुग्न नदिन प्रयासरत रहेका छन् भने हेलिकप्टरहरुबाट पानी बर्षाइएको छ । आगोको ज्वाला सजिलै १ हजार एकड जमिनमा फैलिएको जनाइएको छ । जसका कारण भेन्तुरा काउन्टीका दुई समुदाय सिमी उपत्यका र मुरपार्क छाडेर अन्यन्त्र जान सर्वसाधारणलाई निर्देशन दिइएको छ ।
बुधबार जंगलमा लागेको आगोसँगै क्यालिफोर्नियामा मौसम एकदमै खराब बनेको छ । सापेक्षित आद्रता निकै कम रहेको र हावाको चाप तीब्र बनेको छ ।
त्यस्तै लस एन्जलस क्षेत्रमा सोमबारदेखि फैलिएको गेटी फायर आगोका कारण ७५ सय घर खाली गराइएको छ । यो आगोले कम्तीमा ८ वटा घर जलेका छन् भने ७४५ एकडमा फैलिसकेको छ । लस एन्जलस क्षेत्रमा ७० माइल प्रतिघण्टाको गतिमा हावा चलेको जनाइएको छ ।
जंगलमा लागेको आगोको कारण उत्तरी क्यालिफोर्नियाका ३० वटा काउन्टीमा १५ लाख व्यक्तिका घरमा विद्युत आपूर्तिमा अवरोध उत्पन्न भएको छ । तीमध्ये १० लाख व्यक्तिका घरमा सप्ताहन्तदेखि अहिलेसम्म नै अन्धकार रहेको छ ।
क्यालिफोर्नियामा फैलिएको सबैभन्दा ठूलो आगो अक्टोबर २३ देखि सुरु भएको किन्केड फायर हो । यो क्यालिफोर्निया राज्यको सबैभन्दा ठूलो आगो हो र अहिलेसम्म सकृय रहेको छ । यो आगो ७७ हजार एकड जमिनमा फैलिएको छ । यो आगोले १८० भन्दा धेरै संरचना ध्वस्त पारेको छ जसमा ८६ परिवारका घर समेत रहेका छन् । सानोमा विमानस्थलका कैयन उडानहरु बिहिबारसम्मका लागि रद्द गरिएका छन् ।
