अमेरिकामा दुईपटक मिलियन डलरको लोटरी जिते एउटै व्यक्तिले
प्रकाशित मिति : कार्तिक १५, २०७६ शुक्रबार
धेरैका लागि ज्याकपट लोटरी जित्नु जीवनको एउटामात्र अनुभव हुनसक्छ । तर अमेरिकाको मासाचुसेट्सका रोल्फ रोढ्सले दुईपटकसम्म मिलियन डलरको लोटरी जितेका छन् ।
उनले बुधबारमात्र एकमिलियन डलरको लोटरी जितेका छन् । ४ मिलियन इन्स्ट्यान्ट ज्याकपट नामको खेलमा उनले स्क्र्याच गरेर मिलियन डलरको लोटरी जितेका छन् ।
सन् २०१८ मा पनि उनले एकमिलियन डलरको लोटरी जितेका थिए । तर उनले ट्याक्स काटेर एकैपटक रकम लिन चाहेका कारण उनलाई साढे ६ लाख डलर प्रदान गरिएको थियो ।
यसपटक भने उनले आफ्नो एकमिलियन डलर २० वटा बार्षिक किस्तामा लिने भएका छन् । एकपटकमा उनले ट्याक्स कटाउनुअगाडिको ५० हजार डलर प्राप्त गर्नेछन् ।
यो खेलमा उनले एकमिलियन डलर प्राप्त गरेपनि अरु तीनमिलियन डलरको चिठ्ठा भने बजारमा नै रहेको र अरुले चिठ्ठा किनेर पार्नसक्ने जनाइएको छ ।